Kryeministri i Kosovës, Albin Kurti ka refuzuar një takim me kreun e qeverisë shqiptare, Edi Rama, i cili ka planifikuar një vizitë zyrtare në Kosovë.
Një ditë më parë, zyra e shtypit pranë kreut të qeverisë ka njoftuar se Rama do të zhvillojë një tur në Ballkan në kuadër të Procesit të Berlinit në datat 6 korrik dhe 7 korrik. Sipas të njëjtave burime, kryeministri do të udhëtojë drejt Beogradit, Sarajevës, Prishtinës dhe Shkupit, ndërsa do të zhvillojë takime me krerët e shteteve përkatëse.
Në media është përfolur për një takim të mundshëm të Ramës me Kurtin, megjithatë këtë të mërkurë, kreu i qeverisë së Kosovës e ka hedhur poshtë.
Në një deklaratë për gazetarët nga Prishtina, Albin Kurti tha se nuk e takon Edi Ramën, nëse nuk zhvillohet mbledhja e qeverisë mes dy vendeve që u anulua në mënyrë të njëanshme nga ana e këtij të fundit.
“I kërkova të mbajmë mbledhjen e qeverisë që u anulua. Do rrijë 2 ditë dhe 1 natë në Prishtinë në kuadër të Procesit të Berlinit. I kërkova të bënim mbledhje qeverie për të firmosur marrëveshjet. Nuk e takoj nëse nuk do jetë mbledhje e përbashkët e qeverive që u anulua”, tha Kurti.
Në muajin Qershor, Rama anuloi në mënyrë të njëanshme dhe të paprecedentë një mbledhje të përbashkët mes qeverive të Shqipërisë e Kosovës, ndërsa në disa raste e ka kritikuar publikisht qeverinë e Kosovës së drejtuar nga Albin Kurti, për qasjen ndaj tensioneve në Mitrovicë. Qasje këto që i kanë çuar në pikën më të ulët historike marrëdhëniet mes Tiranës dhe Prishtinës zyrtare.
Për anulimin e mbledhjes së përbashkët, Kurti tha se ka qenë një vendim i njëanshëm dhe i paarsyeshëm nga ana e kryeministrit Rama.
