Kryetari i Partisë Demokratike, Sali Berisha mohoi të ketë gisht në publikimin e video-skandalit të Safet Gjicit. Në një konferencë me gazetarët nga selia blu këtë të premte, Berisha la të kuptohet se ka materiale të ngjashme të zyrtarëve të tjerë të lartë si ai i ish-kryebashkiakut të Kukësit.
Duke hedhur këto akuza, ai përmendi dhe emrin e Erion Veliajt.
“Nuk është praktika ime e luftës politike kjo, se Erion Veliaj nuk do ishte kurrë ky që është në detyrë, po unë jam Sali Berisha dhe nuk shkoj në këto veprime”, tha ai.
- Gjatë konferencës Berisha u pyet: Përgjatë këtyre ditëve, disa media kanë publikuar një audio-përgjim të supozuar të themi ku flitet se protagonistë janë porositësi dhe Alma K. Në audio-përgjimin e pretenduar thuhet se ‘mund të shkosh të takosh Saliun’. Pra ‘shko tako Saliun’. Do doja një koment nga ana juaj lidhur me këtë dhe një sqarim pasi edhe ju jeni në mesin e politikanëve që janë publikuar foto me protagonisten e video-skandalit në zyrën tuaj. Kur e keni takuar Alma K. dhe a ka patur edhe takime të tjera?
Në përgjigje, kryedemokrati tha: Së pari, unë e kuptoj interesin, por çfarë mund të them unë janë tre variante. Varianti i parë është ai që shpjegon Alma. Ai ishte një seks për tender. Kur ua thosha unë këtu ‘korrupsioni erotik’, më thoshit na thuaj raste, ja ku është rasti. Autorja e shpejgon në këtë mënyrë. Varianti i dytë, po unë prova s’kanë, thonë se këtë ia bënë njëri-tjetrit. Grindje e brendshme mes klaneve të PS-së. Përmendin persona të ndryshëm, por unë dokumente dhe fakte nuk kam”.
Më tej shtoi se ka një përpjekje që Almën ta paraqesin si agresore dhe Safetin si viktimë.
“Por kjo është unike në botë. Duket se pasi ka ndodhur historia, lëpirësit e qeverisë kanë gjobitur Safetin. Dhe gjoba flitet deri në 500 mijë euro për të mos e dhënë filmin. Mirëpo ndodhi që filmi u dha dhe tani Safeti kërkon paratë edhe nga burgu. Dhe tani kanë gjetur të thonë: Safet, këta ta ka organizuar Saliu. E kanë hallin që mos i kthejnë borxhin Safetit. Lidhur me Almën, ajo ka ardhur te unë. Unë si rregull nuk bëj publike bisedat, secili prej tyre është i autorizuar të bëjë publike bisedat”, tha.
“Është e vërtetë që ka ardhur, nuk është e vërtetë kurrë se nuk është praktika ime e luftës politike kjo, se Erion Veliaj nuk do ishte kurrë ky që është. Të paktën pesë herë do kish lënë detyrën, po unë jam Sali Berisha dhe nuk shkoj në këto veprime. Këtë e di edhe Erion Veliaj vetë”, përfundoi Berisha.
