Tashmë Prokuroria e Përgjithshme ka depozituar në Komisionin Qëndror të Zgjedhjeve kërkesat për heqjen e mandateve për dy deputetë të Kuvendit të Shqipërisë, Aqif Rakipi dhe Gledion Rehovica. Organi i Akuzës pretendon se dy deputetët janë arrestuar në Itali për vepra penale, por kanë përdorur identitete të tjera, ndërsa janë zbuluar nga shenjat e gishtave.
Duke qëndruar në të njëjtën linjë, dy deputetët janë shprehur se nuk janë njohur me kërkesën për heqjen e mandatit. Deputeti i PDIU-së, Aqif Rakipi ka mohuar pretendimet e Prokurorisë dhe tha se ishte informuar për lajmin nga media. Po kështu edhe deputeti Gledion Rehovica i LSI-së, tha se nuk kishte informacion për kërkesën, por për këtë ishte njohur nga media.
Nëse KQZ do të vendoste pro kërkesës për heqjen e mandatit të Aqif Rakipit, në qarkun e Elbasanit nga lista e PDIU do të hynte Florenca Halili në Kuvend. Ndërsa në qarkun e Beratit nga lista e LSI, në vendin e Gledion Rehovicës do të hynte Silva Caka, e cila ka qenë në Kuvend legjislaturën e kaluar.
