Udhëheqësit e 27 vendeve të Bashkimit Evropian dhe të 20 vendeve të tjera evropiane mblidhen sot në Kishinjev të Moldavisë, për të diskutuar një varg çështjesh, mes tyre edhe tensionet në veri të Kosovës, raporton agjencia e lajmeve Reuters.
Shefi i politikës së jashtme të BE-së, Josep Borrell, pritet të takojë atje presidentin e Serbisë, Aleksandar Vuçiq.
Një ditë më herët, Borrell takoi në Bratisllavë kryeministrin e Kosovës, Albin Kurti.
Në një postim në Twitter pas takimit, Borrell tha se situata në veri të Kosovës është “e rrezikshme dhe e paqëndrueshme”.
Shefi i politikës së jashtme të BE-së, Josep Borrell, tha se ai i kishte kërkuar kryeministrit të Kosovës në Sllovaki të mërkurën që të luante rolin e tij në zbutjen e krizës dhe tha se shpreson që të njëjtin mesazh t’ia transmetonte presidentit serb Aleksandar Vuçiq në Moldavi.
“Ne duhet të shtensjonojmë [situatën]. Ne duhet të qetësohemi”, u tha Borrell gazetarëve në Kishinjev të mërkurën në mbrëmje.
“Ne kemi arritur në një pikë që është e domosdoshme që nivelet alarmante të dhunës të vërejtura në fillim të kësaj jave të ndalen menjëherë. Dështimi për ta bërë këtë mund të çojë në një situatë shumë të rrezikshme”, tha ai.
Bëhet e ditur se edhe presidentja e Kosovës, Vjosa Osmani, ndodhet në Kishinjev për këtë samit.
Samiti në Moldavi do të prekë gjithashtu një sërë çështjesh strategjike, duke filluar nga energjia te siguria kibernetike dhe migrimi.
Ai gjithashtu ofron një mundësi për të adresuar tensionet e tjera në Evropë, përfshirë midis Azerbajxhanit dhe Armenisë, udhëheqësit e të cilëve do të zhvillojnë bisedime me presidentin francez Emmanuel Macron, kancelarin gjerman Olaf Scholz dhe zyrtarë të BE-së.
Moldavia, ashtu si Ukraina, aplikoi për t’u bashkuar me BE vitin e kaluar menjëherë pas pushtimit rus dhe Kishinjev po planifikon të përdorë samitin për të shfaqur reformat dhe për të bindur liderët që të hapin bisedimet e pranimit sa më shpejt të jetë e mundur.
Moldavia ka pranuar më shumë refugjatë ukrainas për frymë se çdo vend tjetër, ashtu si çmimet e ushqimit dhe energjisë u rritën si rezultat i konfliktit.
Qeveria e ka akuzuar Rusinë se po përpiqet të destabilizojë vendin përmes ndikimit të saj mbi lëvizjen separatiste në rajonin e saj kryesisht rusishtfolës, separatist të Transdniestrisë.
- Protestat vijojnë edhe sot
Protestuesit kanë filluar të mblidhen sërish mëngjesin e sotëm në Zubin Potok. Objektin e komunës është duke e ruajtur Policia e Kosovës, ndërsa forca të KFOR-it nuk janë prezente momentalisht.
Qytetarë në Zveçan kanë nisur të grumbullohen që nga orët e para të mëngjesit, por në numër më të vogël se dje.
Punonjësit e Autoritetit të Përkohshëm të Komunës së Zveçanit, që funksionon nën sistemin e Serbisë, janë duke u regjistruar në listën e të punësuarve që është vendosur në një tavolinë, si dëshmi “që vijnë në punë”.
Forcat e KFOR-it janë të dislokuara në të gjithë Zveçanin dhe kështu kanë qenë edhe gjatë natës.
