Sot minorenët po vrasin njëri-tjetrin, ngrenë dorën mbi mësuesit e mbi prindërit e tyre, një situatë që zbulon dështim të shumëanshëm… Me qindra fëmijë kanë mbetur pre e dhunës në institucionet e arsimit. Në këto 30 vite tranzicion është folur shumë për reformat në arsim, por pak për parandalimin e dhunës në shkollë.
Inside Story ka vendosur të trajtojë në këtë emision të tij një vrasje që tronditi nga themelet e opinionit publik shqiptar, duke nxjerrë në sipërfaqe një krizë të thellë të shoqërisë; ekzekutimin me thikë të 15-vjeçarit në Gramsh.
Gjatë ndërtimit të dinamikës së ngjarjes bazuar mbi dëshmitë e dhëna nga adoleshentët para oficerëve të Policisë Gjyqësore, Inside Story ka vendosur të ruaj identitetin e bashkëmoshatarëve që sulmuan viktimën, pasi janë minorenë. Kjo është një plagë e pashërueshme për familjen e të ndjerit, por mbetet një dramë që do të shënjojë jetën e autorëve të ngjarjes që janë thjesht adoleshentë. Më poshtë, zbulohet rrëfimi i Ergit se si agravoi situate derisa ai goditi me thikë Fatjonin fatkeq.
“Dy ditë më parë së bashku me tre shokët e mi, Xhonatan, Orgito dhe Stiven kam vendosur që të shkojë dhe të sqarojë një herë e përgjitmonë konfliktin që Orgito kishte me adoleshentin Qetsor. Dy prej nesh kishin doreza hekuri ngjyrë gold. Ndërsa unë kisha marrë një thikë që hapje me sustë që e bleva në internet dhe doreza të zeza boksi. Stiven kishte marrë një thikë që hapej me dorë dhe një dorezë hekuri”, ka thënë në dëshmi, adoleshenti që kreu vrasjen.
Kështu të katër shokët nga fshati Drizë pasi kishin bërë planin e tyre, në fund të mësimit ishin drejtuar qytetit të Gramshit. Nga larg, në fushën e basketbollit kishin dalluar djalin me të cilin kishin probleme me një grup shokësh.
“Sapo jemi afruar Orgito ka filluar të flasë me Qetsorin. Një djalë që ishte me Qetsorin me flokë kaçurrela më ka sharë. Ky person më goditi me grusht në fytyrë dhe në atë moment nuk e mendova gjatë se m’u errën sytë dhe me dorën e djathtë nxora thikën dhe e godita. Nuk mbaj mend se ku e godita. Gjithashtu nuk mbaj mend nëse kam goditur dikë tjetër pas tij pasi mu errën sytë”, është shprehur gjatë dëshmisë.
Rrëfimet e adoleshentëve për çastet tragjike të vrasjes së Fatjonit
Një prej adoleshentëve në grupin e Ergit, jep një dinamikë më të detajuar mbi atë që ndodhi gjatë momenteve fatale.
Djaloshi tjetër nga fshati Drizë sqaron se ata ishin afruar me presion dhe agresivitet duke zbuluar thikat dhe dorezat.
“Sapo Ergi na ka parë ka veshur dorezat dhe ka nxjerrë thikën dhe i është drejtuar grupit të djemve duke ju thënë : kush kishte sherr me Orgiton këtu? Ndërkohë që Orgito me Qetsorin po mundoheshin të sqaronin muhabetin, afrohet një djalë me kaçurrela dhe i thotë Ergit pse e ke nxjerrë thikën apo për presion dhe e shau. Ergi ju kthye duke e goditur me thikë në pjesën e barkut. Ndërkohë mua më erdhi dikush tjetër dhe më gjuajti me grusht në bark dhe unë ju kundërpërgjigj me grusht se dorezën e kisha në xhep. Më vonë pashë Ergin që po mundohej të gjuante një djalë tjetër me thikë por ky është larguar me vrapë. Më pas kapa Ergin dhe i thash çfarë bën ashtu dhe u larguam me vrap në drejtim të Urës së Trashovicës”, ka dëshmuar një prej adoleshentëve që ka qëne pjesë e grupit të ngjarjes.
Personi tjetër që është goditur me thikë sipas kësaj dëshmie më sipër është kushëriri i Fatjonit, Marko i cili mbeti i plagosur.
Pas situatës kaotike të dhunës, adoleshenti Ergi, nuk e kishte kuptuar ende nëse e kishte goditur personin tjetër. Kjo, zbulohet nga kryqëzimi i dëshmive.
“Gjatë rrugës më ka treguar thikën e gjakosur duke më thënë më duket se i kam gjuajtur atij çunit”, ka dëshmuar shoku i tij.
