Kryetari i Partisë Demokratike, Sali Berisha u shkreh këtë të hënë se së shpejti do të finalizohet raporti që sipas opozitës tregon manipulimin e zgjedhjeve të 14 Majit nga mazhoranca.
Gjatë një takimi me kandidatët e koalicionit opozitar Bashkë Fitojmë në selinë blu, Berisha tha se pas këtij hapi do të nisë analiza.
“Opozita së shpejti do finalizojë raportin. Kemi qenë në kontakt të vazhdueshëm me ju, por e gjykuam të nevojshëm këtë takim sepse kjo është java e fundit nga e cila kërkojmë nga ju për të mbledhur edhe çdo fakt tjetër që mund të ketë mbetur pa u mbledhur. Çdo fakt, çdo dokument, çdo denoncim, në mënyrë që ky raport të jetë sa më i plotë. Ky raport do u paraqitet shqiptarëve, do u paraqitet ndërkombëtarëve. Pas përfundimit të këtij raporti, ne do nisim analizën dhe unë them se është në detyrimin tonë absolut një analizë më seriozja që kemi bërë ndonjëherë për zhvillimet, për problematikat, për mangësitë, për defektet e të gjithë makinerisë sonë elektorale nga kreu tek anëtari i thjeshtë. Mbledhja e këtyre të dhënave është e një rëndësie të jashtëzakonshme, është një detyrim moral dhe ligjor që kemi përpara zgjedhësve shqiptarë. Është jetik për t’u dhënë përgjigjen më të mirë problemeve dhe për të shkuar drejt betejës së ardhshme. Kështu që dua të siguroj anëtarët dhe mbështetësit e PD se analiza e zgjedhjeve, që do jetë faza tjetër pas denoncimit, do bëhet me seriozitetin më të madh. Nuk ka asnjë mëdyshje”, u shpreh kryedmeokrati.
Fjalën e tij, Berisha e nisi duke sjellë në kujtesë një rezolutë të Parlamentit Europian miratuar disa ditë më parë, për të cilin tha se përfshin shqetësimet e PD për zgjedhjet.
Më tej, ai u shpreh se pozita i dha fund në aspektin parlamentar lokal, monizmit të plotë që ekzistonte.
Kryedmeokrati vijoi se kurrë ndonjëherë si në këto zgjedhje “nuk është bërë një përpjekje kaq antikushtetuese nga mafia shtetërore shqiptare e ndërkombëtare, për të shuar opozitën”. Këtu ai hodhi akuza ndaj ambasadores amerikane në vendin tonë Yuri Kim, që sipas tij ndërhyri në procesin gjyqësor për logon e PD, përfshirjen sipas tij të bandave në zgjedhje për llogari të mazhorancës dhe shpërblimet që qeveria alookoi para 14 Majit.
Pas lajmëroi se raporti për zgjedhjet është drejt fundit dhe pas kësaj do nisë procesi i anlizës, një apel e bëri dhe për tijtë.
“Si misionarë duhet të përgatitemi krahas përpjekjeve për një analizë sa më serioze të problematikave tona të brendshme, që të ngremë partinë në një nivel tjetër administrativ, të përtërimë siç erdhët ju me primaret, të bëjmë gjithçka që shqiptarët të votojnë të lirë. A e kemi bërë ne këtë? Jo. A e ka bërë për PD? Jo. Nëse në vitin 2021 në prill, të cilat ishin zgjedhje politike, PD do mbronte votën, do derdhej në rrugë, këto probleme që ndodhën, nuk do ndodhnin kurrë në këtë shkallë. Por PD nuk e bëri këtë. Nuk e bëri as në vitin 2019. Tani nuk mund të qëndrojmë vetëm në fushën e fjalëve. Vlerësoj çdo propozim për përmirësim maksimal të punës sonë. Por ju garantoj se me Edi Ramën, zgjedhje nuk ka. Ndaj dhe ftoj çdo demokrat, t’i drejtohet fibrës së tij politike, ndërgjegjes së tij politike, të mos harrojë këtë gjë”, tha Berisha.
Ai shprehu bindjen se pas analizës “do të ngrihemi me një lëvizje të fuqishme kundër armikut më të egër të lirisë së shqiptarëve, që tashmë është i njohur, Edi Rama dhe qeveria e tij. Kam besim se demokratët janë të gatshëm, se mbi 500 mijë idealistë që qëndruan të pamposhtur, do i japin kthesë vendimtare vendit”.
