Policia ka zbuluar ditën e sotme në fshatin Skuraj, në Kurbin, 31 sera të vogla brenda të cilave ishin të kultivuara 3510 bimë narkotike të dyshuar cannabis sativa.
Si pasojë blutë bëjnë me dije se është arrestuar një person, ndërsa është shpallur në kërkim një tjetër.
Zbulimi i parcelave me kanabis ka ardhur si rezultat i kontrolleve intensive, nga toka dhe ajri, në bashkëpunim me GDF-në.
Ndërkohë bëhet me dije se në pranga ka rënë shtetasi, Dritan Margjonin, 44-vjeç, si dhe është shpallur në kërkim Fation Margjonin, 34-vjeç, si autorë të dyshuar të kultivimit të bimëve narkotike.
Gjithashtu, nga hetimi, raportohet se janë identifikuar dhe autorë të tjerë të kësaj veprimtarie kriminale, të cilëve, ende nuk i’u janë publikuar të dhënat.
Çfarë thotë Policia?
Kontrolle intensive, nga toka dhe ajri, në bashkëpunim me GDF-në.
Gjithashtu, hetime proaktive dhe operacione të njëpasnjëshme, për parandalimin, evidentimin dhe goditjen e tentativave për kultivim të bimëve narkotike.
Finalizohet faza e gjashtë e megaoperacionit policor antikanabis të koduar “Imazhi”.
Gjatë kësaj faze të megaoperacionit, në një terren të vështirë malor, në fshatin Skuraj, Kurbin, janë gjetur dhe shkatërruar 31 sera të vogla, brenda të cilave ishin të kultivuar 3510 bimë narkotikë cannabis sativa.
Arrestohet 1 shtetas dhe shpallet në kërkim 1 tjetër, si autorë të dyshuar për kultivimin e këtyre bimëve narkotike.
Si rezultat i punës intensive në çdo skaj të qarkut, kundër kultivimit të bimëve narkotike, shërbimet e Komisariatit të Policisë Kurbin organizuan fazën e gjashtë të megaoperacionit policor antikanabis të koduar “Imazhi”, si rezultat i një hetimi me metoda proaktive, të nisur që në muajin prill, nga Policia e Kurbinit, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Lezhë.
Gjatë kontrolleve në fshatin Skuraj, Kurbin, në një zonë të pyllëzuar dhe të vështirë malore, u gjetën dhe u shkatërruan 31 sera të vogla, brenda të cilave ishin të kultivuar 3510 bimë narkotikë cannabis sativa.
Si rezultat i hetimit intensiv proaktiv, është bërë i mundur dokumentimi me prova ligjore i kësaj veprimtarie kriminale, arrestimi i shtetasit D. M., 44 vjeç, si dhe shpallja në kërkim e shtetasit F. M., 34 vjeç, si dy nga autorët e dyshuar të këtyre tentativave për të kultivuar bimë narkotike. Vijon puna për kapjen e 34-vjeçarit.
Gjithashtu, nga hetimi janë identifikuar dhe autorë të tjerë të kësaj veprimtarie kriminale, të cilëve, për shkak të konfidencialitetit të hetimit, nuk mund t’iu bëjmë me dije të dhëna.
Megaoperacioni policor antikanabis “Imazhi”, vijon.
Materialet procedurale i kaluan Prokurorisë, për veprime të mëtejshme.
Ndërkohë një tjetër rast i kultivimit të lëndëve narkotike, është pikasur pak më herët nga Policia në Nikël, ku janë zbuluar 3 parcela me kanabis.
Parcelat janë gjetur përkatësisht në fshatrat Kuçaj, Zezë dhe Verjon, ku jane asgjësuar 685 fidanë kanabis të kultivuar në tokë.
Ky aksion ka ardhur në bashkupunim me 6 grupe të FNSH Tiranë, ndërkohë lidhur me rastin është shpallur në kërkim shtetasi, A. D., 53 vjeç, një nga autorët e dyshuar të kultivimit të bimëve narkotike.
FNSH aksion në Nikël/ Zbulohen 3 parcela me kanabis, shpallet në kërkim një 53-vjeçar (Video)
