Kuvendi i Shqipërisë miratoi vetëm me votat e socialistëve në seancën e së hënës Arta Markun në postin e Prokurores së Përgjithshme të përkohshme. Proçedura e zgjedhjes së Markut u kontestua fort nga opozita, e cila protestoi në sallë dhe jashtë saj me argumentin që u shkel Kushtetuta.
Në më pak se 1 javë nga dita e zgjedhjes së Kryeprokurores, ka ardhur edhe reagimi i parë i një diplomati që ka kontestuar procesin.
“Personi i zgjedhur përtej meritave të tij profesionale, që sigurisht janë shumë dhe prandaj nuk duhet të minojnë punën e saj, u zgjodh vetëm nga një parti politike dhe kjo mendoj se ishte një mundësi e humbur”, tha Ambasadori italian në Tiranë Alberto Cutillo për Radio Radicale.
Diplomati italian shtoi se duhej të ishte zgjedhur një prokuror konsensual sepse ndonjëherë kjo situatë e përkohshme mund të zgjasi për një kohë të gjatë.
Ai tha se prokurorja “është e përkohshme, por askush nuk mund të na tregojë se sa kohë do të zgjasë dhe ndonjëherë situata e përkohshme mund të zgjatet në kohë. Kështu, në të mirë të Shqipërisë, një zgjedhje konsensuale do të ishte e përshtatshme, një zgjedhje që për këtë arsye nuk krijon ndarje. Për fat të keq, dhe këtu themi se partitë politike duhet të vënë në pyetje përgjegjësitë e tyre përkatëse, për fat të keq nuk kemi arritur në këtë lloj zgjedhjeje”.
“Duhet të jemi të vëmendshëm për respekimin e ndarjes së pushtetit”, tha Cutillo duke folur për zbatimin e reformës në drejtësi.
