Policia ka arrestuar ditën e sotme një 39-vjeçar pas vendimit të Gjykatës së Shkallës së Parë të Juridiksionit të Përgjithshëm Durrës, për dënimin e tij me 18 vjet burgim.
Në pranga ka rënë, shtetasi Afrim Kila, i cili ishte me masë sigurie “Arrest në shtëpi” dhe është dënuar për vrasjen e një personi në vitin 2020.
Ngjarja ndodhi në ambientet e një lokali në Ishëm, ku Kila goditi personin me mjete të forta dhe më pas në rrugë e goditi me automjet, duke i shkaktuar vdekjen.
Njoftimi i policisë
Manzë, Durrës
Ndalohet një shtetas i dënuar me 18 vjet burgim për vrasje me dashje.
Më datë 19.05.2023, në përfundim të hetimeve për ngjarjen e ndodhur në vitin 2020, në ambientet e një lokali, në Ishëm, ku shtetasi Afrim Kila goditi me mjete të forta dhe më pas në rrugë e goditi me automjet, shtetasin D. (P). K., i cili si pasojë e plagëve të marra humbi jetën në spital, Gjykata e Shkallës së Parë të Juridiksionit të Përgjithshëm Durrës e ka deklaruar fajtor këtë shtetas dhe e ka dënuar me 18 vjet burgim, për veprën penale “Vrasja me dashje”.
Në vijim të veprimeve shtetasi Afrim Kila u transportua në IEVP Durrës, për të vuajtur dënimin.
