Një 18-vjeçar shqiptar, Admir Hoti, ka ndërruar jetë mbrëmjen e djeshme, pasi u përfshi në një aksident në unazën e Portogruaros në Itali. Shkak i aksidentit me dy të plagosur dhe një të vdekur dyshohet asfalti i lagësht. Një nga të plagosurit është babai i viktimës.
Aksidenti është shkaktuar nga rrëshqitja e një Fiat Grande Punto e cila po lëvizte nga San Stino në drejtim të Portogruaro. Pasi kaloi nëpër rrethrrotullimin e interportit, shoferi vazhdoi drejt unazës Mattei, kur, pranë një kthese, humbi kontrollin. Një Chevrolet po mbërrinte në drejtim të kundërt, drejtuesi i të cilit u përpoq të shmangte goditjen duke goditur pengesën në anë të rrugës.
Alarmi është ngritur menjëherë nga disa shoferë kalimtarë. Ekipet e shpëtimit kanë mbërritur në vendngjarje me tre autoambulanca, zjarrfikëse dhe dy patrulla karabinierësh.
