Një kontratë koncesionare 430 milionë euro për djegien e mbetjeve në një incenerator në Sharrë nuk kanë mjaftuar që lagje të caktuara në Tiranën e Erion Veliajt, të kundërmojnë erë nga koshat e tejmbushur me mbeturina në kulmin e fushatës elektorale.
Në profilin në Facebook me emrin “Vrojtuesit e Lagjes Tiranë”, që denoncon çdo ditë problematika nga kryeqyteti, janë publikuar disa foto nga zona e ish-Fushës së Aviacionit ku bien në sy koshat “e gjelbër” të mbeturinave që janë mbushur plot, e madje plehrat janë përhapur në rrugë e mbi trotuar.
Fotot janë shkrepur mbrapa shkollës “Dhora Leka” dhe sipas denoncimit situate është e tillë çdo ditë.
Vetëm tek kompleksi “Turdiu” që gjendet aty jetojnë mbi 450 familje, ndërkohë që Bashkia ka vendosur në dispozicion vetëm 3 kazanë, që pastrohen jo më shumë se 2 herë në ditë, duke bërë që panorama të jetë e nderë.
Banorët e zonës i kanë bërë disa herë kërkesë bashkisë së Tiranës për të ndryshuar këtë situatë, por duket se Erion Veliaj e ka lënë kryeqytetin në harresë sa i përket menaxhimit të mbetjeve urbane, duke u fokusuar në rekrutimin e VIP-ave të showbizit për t’i përmirësuar imazhin në sytë e ndjekësve të tyre.
Në një kohë që bashkia e “Lali Erit” nuk i ndal pagesat e tarifës 29 euro për ton/mbetje që depozitohen me qëllim incenerimin e tyre në inceneratorin që do të ngrihej në landfillin e Sharrës dhe i jep privatit 1 mln euro për pastrimin e sheshit “Skënderbej”, duket se mungojnë paratë për të shtuar disa kazanë te ish-Fusha e Aviacionit.
Veliaj sakaq vazhdon fushatën për mandatin e tretë duke premtuar edhe pas 8 viteve si kryebashkiak një Tiranë të pastër dhe pa plehra, ndërkohë që banorët në zona të caktuara janë të shqetësuar nga era e rëndë dhe zhuli që mbizotëron në rrugicat e tyre./BN/
