Shqipëria është tronditur sërish nga një tjetër vrasje.
Nga të dhënat paraprake mësohet se ngjarja ka ndodhur mesditën e së martës në lagjen “Skënderbeg” në qytetin e Shkodrës, pranë shkollës pyjore.
Nga informacionet e para viktima është identifikuar si Petrit Vuksani (51 vjeç). Burimet mediatike bëjnë me dije se autori i është futur në banesën e viktimës dhe ka qëlluar për vdekje 51-vjeçarin. Por ende nuk dihet shkaku, pasi viktima vetëm një muaj më parë kishte ardhur nga Anglia.
Fqinjët nuk ka dëgjuar krisma të armës në momentin kur ka ndodhur ngjarja, ndaj policia dyshon paraprakisht se autori ka përdorur silenciator për të kryer vrasjen.
Policia ndodhet në vendngjarje dhe po merr provat për të zbardhur ngjarjen.
- Çfarë njofton policia?
“Rreth orës 12:15, në lagjen “Tom Kola”, në rrethana ende të paqarta, në banesë, është vrarë me armë zjarri shtetasi P. V., 51 vjeç. Shërbimet e Policisë dhe grupi hetimor kanë shkuar menjëherë në vendngjarje. Janë ngritur pika kontrolli dhe po ushtrohet kontroll në zonë për kapjen e autorit të dyshuar. Grupi hetimor, në drejtimin e Prokurorisë, po vijon punën për sqarimin e rrethanave të ngjarjes, si dhe për sigurimin e çdo prove, me qëllim identifikimin dhe kapjen e autorit”, ben me dije policia.
Boldnews.al ka publikuar pamjet nga vendi i ngjarjes.
