Duket se dyshimet mbi motorin e gjetur nga Policia në lidhje me vrasjen e biznesmenit Ardian Nikulaj kanë qenë konkrete, pasi edhe autoritet kanë dyshime se ai mjet nuk është i njëjti i përdorur nga ekzekutori ditën e krimit.
Motori i gjetur më 27 Prill në një përrua pranë banesës së Edmond Haxhiajt në fshatin Kakarriq të Lezhës, ishte i ndryshëm me atë i kapur nga kamerat e sigurisë duke e drejtuar vrasësi portugez Ruben Saraiva si; targa e mjetit, mungesa e pasqyrave, forma e marmitë, etj.
Policia po verifikon dhe ekzaminon imtësisht motorin e gjetur, pasi ka dyshime se nuk është i njëjti. Hetuesit po kalojnë në sitë karakteristikat e mjetit të blerë në Tiranë i cili mendohet të jetë përdorur për të kryer krimin, me atë të gjetur në lum 300 metra larg shtëpisë së Edmond Haxhisë.
Ky i fundit u arrestua në Britani si organizatori dhe porositësi i vrasjes së Ardian Nikulajt brenda lokalit të tij në Shëngjin mesditën e 19 Prillit. Veç tij dhe ekzekutorit portugez, akuzohen edhe 4 britanikë në rolin e vëzhguesit dhe informatorit.
Një prej britanikëve dhe ekzekutori portugez vazhdojnë të jenë ende në kërkim nga Policia. Ardian Nikulaj dyshohet se është vrarë për gjakmarrje, por nuk përjashtohen edhe pistat e tjera.
