Shkon në 4 numri të arrestuarëve për vrasjen e Ardian Nikulajt në Shëngjin.
Vrasja e biznesmenit Ardian Nikulaj brenda lokalit të tij në Shëngjin vijon të jetë në sitën e hetimeve ndërsa detaje të reja dalin në dritë. Policia njoftoi edhe arrestimin e shtetases britanike, Harriet Bridgeman.
Burimet bëjnë me dije se të arrestuarit janë: Harriet Bridgeman, Stephen Hunt, Thomas Mithan dhe Edmond Haxhia (i dyshuar si porositësi).
“Në vijim të punës kërkimore për lokalizimin dhe kapjen e personave të shpallur në kërkim për vrasjen e shtetasit Ardian Nikulaj, falë bashkëpunimit të ngushtë mes Policisë shqiptare dhe asaj britanike, pas shkëmbimit të informacionit, lokalizohet, kapet dhe vihet në pranga, me qëllim ekstradimin drejt Shqipërisë, shtetasja britanike H. B. Ndërkohë, Policia e Shtetit vijon intensivisht punën, në bashkëpunim të ngushtë me partnerët, për lokalizimin dhe kapjen edhe të 2 personave të tjerë të shpallur në kërkim në lidhje me ngjarjen.” –thuhet në njoftimin e policisë.
Mësohet se operacioni për kapjen e autorëve është koordinuar nga Policia e Shtetit në bashkëpunim me Policinë Metropolitane angleze dhe agjencinë kundër krimit të organizuar, e njohur si FBI-ja angleze, NCA.
Nikulaj u ekzekutua me armë zjarri në ambientet e lokalit të tij “Coral” rreth orës 13:25, të 19 Prillit. Policia konfirmoi caktimin e masës së sigurisë arrest me burg në mungesë nga Gjykata e Lezhës për gjashtë persona, të dyshuar si të përfshirë në vrasjen e Nikulajt.
