Më datë 23 prill ditën e dielë do të mbahen zgjedhjet e pjesshme lokale të parakohshme për 4 komunat në veri të Kosovës. Komisioni Qendror i Zgjedhjeve konfirmon se përgatitjet janë drejt përfundimit. Në Zubin Patok janë vendosur kontejner të cilat do të përdoren për procesin e votimit. E njëjta praktikë është ndjekur edhe në Mitrovicën e Veriut, Zveçan dhe Leposaviç.
“Për momentin për përgatisim qendrat e votimit që do të hapen për ditën e zgjedhjeve. Në këto katër komunave, ne kemi një total prej 19 qendrash, 6 janë të rregullta dhe 13 janë në qendra alternative që do të mbahen në objekte të tjera në disa lokacione të këtyre katër komunave”, u shpreh Elezi.
Në mbledhjen e fundit të KQZ-së u bë e ditur se përveç vëzhguesve, në terren janë angazhuar dhe ekipe lëvizëze për të monitoruar procesin zgjedhor.
“Gjithsej kanë aplikuar 37 organizata vëzhguese duke përfshirë subjektet politike, përfaqësues të vendeve të huaj në Kosovë, shtëpi mediatike dhe OJQ…. Zyra konstaton se 6 OJQ nuk përmbushin kushtet ose kriteret ligjore për tu akredituar si vëzhguese për shkak se nuk janë të specializuara në zgjedhjeve dhe në fushën e mbrojtjes së të drejtave të njeriut…Në total do të jenë 31 organizata që do të marrin pjesë në procesin e vëzhgimit me gjithsej 357 vëzhgues”, tha Burim Ahmetaj, shef i sekretariatit të KQZ.
Zgjedhjet në Veri të Kosovës
Zgjedhjet e jashtëzakonshme për kryetarët e Mitrovicës së Veriut, Leposaviçit, Zveçanit dhe Zubin Potokut, janë shpallur për 23 prill, pasi kryetarët e Listës Serbe kanë dhënë dorëheqje për shkak të vendimit të Qeverisë së Kosovës për zbatimin e procesit të riregjistrimit të automjeteve nga targat serbe në targa të Kosovës. Zgjedhjet e paralajmëruara më parë, për 18 dhjetor të vitit të kaluar, u shtynë me kërkesë të bashkësisë ndërkombëtare. Afati për paraqitjen e kandidaturave ka skaduar më 22 mars. Komisioni Qendror i Zgjedhjeve i Kosovës ka bërë të ditur se nuk ka aplikime të reja, por vetëm u janë konfirmuar kandidaturat atyre që kanë aplikuar për pjesëmarrje në zgjedhjet e 18 dhjetorit. Kjo do të thotë se janë gjithsej 11 kandidatë nga katër subjekte politike, prej të cilëve vetëm dy janë të komunitetit serb.
