Policia e Vlorës ka arrestuar ditën e sotme një ish-doganier, pasi dyshohet se gjatë ushtrimit të detyrës, në këmbim të ryshfetit, ka lejuar futjen e mallrave kontrabandë.
Blutë bëjnë me dije se në pranga ka rënë 46 vjeçari me iniciale A.N.
Mësohet se ky i fundit para një viti është dënuar me burg nga Gjykata e Posaçme e Shkallës së Parë për Korrupsionin dhe Krimin e Organizuar, Tiranë.
“Nga strukturat hetimore të DVP Vlorë, u bë ndalimi i shtetasit A. N., 46 vjeç, banues në Vlorë, pasi Gjykata e Posaçme e Shkallës së Parë për Korrupsionin dhe Krimin e Organizuar, Tiranë, me vendimin e datës 18.04.2022, i ka caktuar masën e sigurisë “Arrest në burg”, për veprën penale “Korrupsion pasiv i personave që ushtrojnë funksione publike”.
Ky shtetas dyshohet se gjatë ushtrimit të detyrës si doganier në portin e Vlorës, në këmbim të ryshfetit, ka lejuar futjen e mallrave kontrabandë”, thuhet në njoftimin e policisë.
