Kreu i Partisë së Lirisë, Ilir Meta e sheh varfërinë si një nga problemet kryesore të familjeve shqiptare dhe kryesisht qarkut të Elbasanit, aty ku ditën e djeshme u gjend në krah të kandidatit të koalicionit “Bashkë Fitojmë”, Luçiano Boçi.
“Varfëria përbën një nga kërcënimet kryesore të familjes shqiptare dhe kambanat e alarmit sot janë të mëdha mbi familjet në qarkun e Elbasanit, që është qarku i dytë më i varfër në vend”, nënvizon Meta, teksa ndan foto nga takimi me qytetarët në Elbasan.
Duke nënvizuar se “nevoja për ndryshim është ulëritëse”, Meta thekson se dje së bashku me Boçin ndërmorën hapin e parë.
“Në Elbasan, mbrojtja e familjes dhe rikthimi i shpresës tek të rinjtë është emergjencë. Duhen propozime dhe plan konkret! Prezantuam propozimet tona konkrete në tryezën “Të Mbrojmë Familjen dhe të ardhmen e fëmijëve tanë. Kënaqësi që në këtë tryezë të kishim prezent kryebashkiakun e ardhshëm të Elbasanit, z.Luçiano Boçi dhe Kryebashkiaken e ardhshme të Prrenjasit, znj. Suzana Topi, të cilët janë kaq shumë të përkushtuar për t’ju shërbyer qytetarëve, për të hartuar dhe propozuar politika konkrete dhe të çmuara, që e fuqizojnë familjet, që i japin shpresë të rinjve, që i nxisin dhe inkurajojnë ata të krijojnë familjet e tyre dhe ta ndërtojnë të ardhmen e tyre në Shqipëri”, shkruan ai në FB.
Më tej, kreu i PL nënvizonse opozita është e vendosur për të nxjerrë Elbasanin nga lista e qarqeve më të varfëra të Shqipërisë.
“Ne jemi të vendosur për fuqizimin ekonomik të familjeve dhe krijimit të mundësive për të rinjtë dhe të rejat e mrekullueshme të Elbasanit, Cërrikut, Librazhdit, Përrenjasit, Gramshit, Peqinit dhe Belshit. Bashkë fitojmë!”, thekson Meta.
