Një 21-vjeçar i përfshirë në veprimtarinë kriminale të trafikut të emigrantëve, është vënë në pranga në Kapshticë.
I riu nga Maliqi është provuar se në të paktën katër raste ka tentuar të ndihmojë dhjetëra shtetas të huaj nga vendet e treta për të kaluar kufirin, por ata janë bllokuar nga forcat e Policisë.
I ndaluari dyshohet se është pjesëtar i një grupi më të madh që ushtron veprimtarinë kriminale të dhënies ndihmë emigrantëve, kundrejt pagesës, për kalim të paligjshëm të kufirit.
Njoftimi i policisë:
Shërbimet e Stacionit të Policisë Kufitare Kapshticë, në bashkëpunim me specialistët për Hetimin e Trafiqeve të Paligjshme dhe Narkotikëve të DVP Korçë, në bazë të inteligjencës informative se 1 shtetas i shpallur në kërkim në kuadër të operacionit policor “Perimetri”, po tentonte të hynte në territorin shqiptar, kanë kapur në Kapshticë dhe kanë ndaluar shtetasin S. L., 21 vjeç, banues në Maliq.
Gjykata e Shkallës së Parë Korçë i ka caktuar 21-vjeçarit, masën e sigurisë “Arrest në burg në mungesë”, për veprën penale “Ndihma për kalim të paligjshëm të kufijve”, kryer në bashkëpunim.
Nga tërësia e veprimeve rezulton se shtetasi S. L., në bashkëpunim me shtetas të tjerë (të arrestuar e proceduar gjatë episodeve të operacionit “Perimetri” gjatë vitit 2022) në 4 raste gjatë vitit 2022, ka tentuar për të ndihmuar, kundrejt fitimit, për të kaluar kufirin, në mënyrë të paligjshme, dhjetëra shtetas të huaj nga vendet e treta që hyjnë ilegalisht nëpërmjet kufirit me shtetin grek, të cilët janë bllokuar nga shërbimet e Policisë, gjatë operacioneve policore.
Materialet i kaluan Prokurorisë pranë Gjykatës së Shkallës së Parë Korçë.
