Nga Boldnews.al
Është thjesht një rastësi, por dy sundimtarët autoritarë, që kanë miqësi me njëri-tjetrin do kthehen problem për Europën dhe SHBA-të teksa pushtetimi i gjatë duke shkelmuar parimet e demokracisë do i kthejë de facto në “Sulltanë”. Më 14 maj, presidenti turk Rexhep Taip Erdogan dhe kryeministri Edi Rama do të masin forcën me elektoratin e varfër, të shantazhueshëm, apo edhe të blerë. Në Turqi zhvillohen zgjedhje presidenciale dhe parlamentare, ndërsa në vendin tonë zgjedhje lokale.
Të dy janë në një pikë kritike. Erdogan ndodhet para pakënaqësisë së madhe popullore për shkak të tërmetit tragjik dhe mungesës së masave të shtetit për cilësinë e ndërtimeve që u rrënuan, ndërsa Rama si kurrë më parë është i detyruar që të fitojë zgjedhjet lokale në çdo formë, për t’i pasur si garanci për mandatin e tij të katërt, por mbi të gjitha si kamzhik për të kërcënuar SHBA-të, me parimin: “Unë jam këtu i pushtetshmi dhe me mua do të bashkëpunoni”.
Kryeministri ynë, në vitin e dhjetë të qeversjes e ka zbrazuar vendin nga rinia që mori rrugën e emigracionit ilegal, duke vendosur në alarm shtete të mëdha si Anglia, Gjermania, Franca apo Belgjika. Varfëria ka kapur kulmin, korrupsioni nuk njeh kufi, ndërsa pushtetet në letra të pavarura janë tërësisht në kontrollin qeveritar. Kjo është situata e brendshme e Ramës, e cila duket se është gatitur me kohë për të zbrazuar vendin duke e lënë me pensionistë dhe nëpunës të administratës qëndrore dhe lokale të cilët janë hambar votash.
Çedimi i madh ka ndodhur me Shtetet e Bashkuara të Amerikës të cilët jo vetëm ndihen të zhgënjyer nga Rama, por po e shohin si “armikun” e tyre, kur bashkë me ish-kryeagjentin e kundrazbulimit në FBI Charls McGonigal janë përfshirë në një aferë të madhe kurruptive dhe lidhje me oligarkët rusë.
Ndërsa McGonigal po përgjigjet para drejtësisë në New York dhe Washington për të paktën katër takime të fshehta me Ramën, duke marrë informacione nga zyra e tij për të sulmuar opozitën shqiptare dhe më pas përfituar fusha nafte në vendin tonë, vetë Rama këtu duket se po e rimerr veten pas ditëve të zymta kur u bë publik skandali i madh me McGonigal.
Si barkë shpëtimi Rama sheh zgjedhjet lokale. Duke fituar shumicën nga 61 bashki të vendit dhe rrënuar edhe më shumë opozitën ai kërkon që të duket si i “vetmi” që SHBA-të do jenë të detyruara të bashkëpunojnë me të, madje t’i ripërkedhëlin kokën, ashtu siç kanë bërë disa syresh në majën e ambasadës amerikane në Shqipëri, apo individë të ndryshëm në DASH që u peshkuan aq lehtë nga miku i Ramës, McGonigal.
Çuditërisht 14 maji mund të jetë “ditë feste” për dy autokratët e mëdhenj të Europës, Rexhep Taip Erdogan dhe Edi Rama. E sigurt është edhe se që të dy në rast suksesi do telefojnë njëri-tjetrin për të uruar pushtetimin dhe shkelmuar edhe më shumë parimet demokratike në vendet respektive që duket se po u shijon “Sulltanizmi”.
