Grupi i Enkelejd Alibeajt që mban logon e Partisë Demokratike ka vendosur që në zgjedhjet e 14 majit të hyjë me 20 kandidatë për kryetar bashkie dhe këshillat bashkiakë.
Në 16 bashki, përfshirë Tiranën, Alibeaj do të ketë kandidatët e tij, çka do të thotë se përballja në këto zona do të jetë me tre rivalë, por kjo lëvizje nuk e bind analistin Andi Bushati, i cili mendon se kemi të bëjmë me një skenar.
Sipas Bushatit skenari i PD me kryetar të komanduar Enkelejd Alibeajn do të çojë ujë në “mullirin” e Ramës. Duke argumentuar tezën e tij, Bushati tha se Alibeaj nuk mund të ketë majftueshëm komisionerë nëse nuk nxjerr as 1/3 e kandidatëve për kryebashkiakë.
Në emisionin “Noë”, analist i njohur u shpreh se nëse kjo ndodh, atëherë komisionerët do t’i marrë mazhoranca.
“I duhet gjithmonë regjimit një opozitë false, të jep gjithë ato avantazhe, një çete që nuk nxjerr dot as 1/3 e kandidatëve. Është brenda logjikës së lojës si zhvillohen zgjedhjet në Shqipëri. Ndoshta mund të dojë t’i çojë komisionerët te Edi Rama.
Një parti që nuk bën dot 13 e kandidatëve, nuk besoj se bën dot 5200 komisionerë. Nëse komisionerët nuk i bën dot çeta e vogël e Alibeajt, atëherë komisionerët i merr Edi Rama”, theksoi ai.
