Nga Peqini, ku prezantoi para popullit opozitar kandidatin e koalicionit “Bashkë Fitojmë” për zgjedhjet lokale të 14 Majit, Mustafa Pashja, kryedemokrati Sali Berisha ka denoncuar vjedhjen masive me tenderat publikë.
Teksa i cilësoi kandidatët e PS për zgjedhjet lokale, si figura të caktuara nga padrino i mafias më të rrezikshme në Europë (Edi Rama), ai theksoi se emrat e dalë nga “Primaret” janë dhëndurë të lirisë.
“Ky entuziazëm është energjia e bashkimit të shqiptarëve në një betejë historike, në betejën e rivendosjes së pluralizmit, energjia e fitores më 14 maj të kandidatëve të Primareve në mbarë Shqipërinë, energjia e ndryshimit që po vjen, e shpresës që sjell ndryshimi. Kandidatët e Primareve janë nuset e dhëndurët e lirisë.
Sot në Peqin e mbarë Shqipërinë kemi kandidatë më të mirë se kurrë më parë. Krahasojini me kandidatët e palës tjetër që dalin në 12 të natës si nga bodrumet e mafias, nga padrino i mafias më të rrezikshme në Europë, Edi Rama”, tha ai.
Ndër të tjera Berisha u ndal te kostot e larta të veprave infrastrukturore që tenderon ministrja Belinda Balluku me bekimin e kryeministrit Edi Rama, duke u ndalu konkretisht te vlera e rrugës anësore Lekaj-Fier.
Ai u shpreh një kilometër rrugë anësore po kushton në Shqipëri 3.5 herë më shumë se autostrada dhe kjo vjen sepse 70-90 përqind e tenderave vidhen.
“Nëse enti i prokuriomeve Publike i thotë kryeministrit që kontrata është e paligjshme ai nuk mund ta firmosë. Ai ent e ai drejtor paguhet si gardian i prokurimeve publike. Dy herë i çoi Edmond Ahmeti shkresë se ishte e paligjshme, Rama firmosi se ishte ndërmarrja e tij.
Punët publike, rrugët, ujsjellësat, vjedhin në to të paktën 70-90 përqind të fondeve. S’ka vend në botë që ndërton autostradën me 24 mln euro kilometrin si Rama me Belinda Ballukun.
Kudo autostrada kushton maksimumi deri në 3 mln euro. Rrugës anësore Lekaj-Fier po ndërtohen me 7.2 mln euro, kur autostrada Lushnje-Fier, 1.2 mln euro. Rruga anësore 3.5 më shumë se autostrada”, tha Berisha.
