Kryetari i Bashkisë së Bulqizës, Lefter Alla akuzon kryeministrin Edi Rama se qëndron pas arrestimit të tij lidhur me çështjen e tenderit e ujësjellësit.
Kryebashkiaku socialist i Bulqizës, Lefter Alla doli paraditen e sotme para gjykatës për t’u njohur me masën e sigurisë ndaj tij. Ndaj tij u caktua masa e arrestit me burg. E njëjta masë u la në fuqi edhe për 10 persona të tjerë. GJKKO po ashtu rikonfirmoi dy masa “arrest shtëpie”.
Alla akuzohet për veprat penale “Shkelja e barazisë së pjesëmarrësve në tendera apo ankande publike”, “Shpërdorimi i detyrës” dhe“Falsifikimi i dokumenteve”. Procedura tenderuese për të cilën akuza ka gjetur shkelje është ajo e ujësjellësit me vlerë afro 3 milionë euro. Sipas hetimeve, Alla në bashkëpunim me nëpunësit kanë favorizuar një bashkim kompanish që të fitonte tenderin. Kompania fituese në fakt, rezulton se nuk ka kryer punime për kontratën e lidhur me bashkinë, por ato i ka realizuar një firmë tjetër me pronar Aqif Koneshën, që SPAK e cilëson lidhje shoqërore të kryetarit të Bashkisë.
Përplasja me Ramën
Kryebashkiaku ka mohuar akuzat ndaj tij, të cilat i konsideron politike.
“Në gjykimin tim më mirë të më thoshin hap krahun, se sa të bëhen këto gjyqe politike”, është shprehur në dëshminë e tij kryebashkiaku, duke akuzuar kështu shefin e tij politik Edi Rama. Ai shtoi se nëse do ta dinte se ç’do të ndodhte, nuk do të vendoste të rikandidonte si kryetar bashkie. Deklaratë kjo që shkon në mbështetje të zërave se mes Ramës dhe Allës ka pasur përplasje interesash lidhur me rikandidimin për zgjedhjet lokale të 14 Majit.
Pretendimet e Allës i konfirmoi dhe avokati i tij. “Ai (Alla) bëri gabim që i kushtoi shumë shtrenjtë se duhet të ishte më i zgjuar e duhet të kishte pranuar atë moskandidim”, tha avokati Hysni Demiraj pas seancës, në një prononcim për gazetarët, duke lënë të kuptohet se kryeministri Edi Rama nuk ishte dakort me rikandidimin e Lefter Allës për Bashkinë e Bulqziës. “Duhet të kishte pranuar atë moskandidim”, thotë avokati, duke zbuluar se nga ana e kreut të qeverisë i është bërë e qartë se nuk preferohej si kandidat i PS për lokalet e 14 Majit, por Alla ka refuzuar.
Hetimet
Trembëdhjetë persona, përfshirë Lefter Allën dhe zyrtarë të tjerë të Bashkisë Bulqzië janë arrestuar, sipas SPAK. Ndaj 11 prej tyre, sipas akuzës, GJKKO caktoi me kërkesë së SPAK masat e arrestit me burg më 14 Mars, që u ekzekutuan nga policia dy ditë më vonë (megjithatë çuditërisht, ndaj njërit prej tyre masa nuk u ekzekutua pavarësisht pretendimit të SPAK). Ndërsa ndaj dy të tjerëve u ekzekutua masa e arrestit shtëpiak.
Prokuroria bën me dije se nga hetimi, ka rezultuar se për shtetasin nën hetim Lefter Alla me detyrë Kryetar Bashkie me funksionin e tij si i zgjedhur vendor për të administruar konform ligjit Njësinë vendore Bashkinë Bulqizë, evidentohet qartësisht sjellja e tij duke dokumentuar disa fakte penale si shkeljet gjatë procedurës së prokurimin publik me procedurë të hapur në datë 30.04.2021, operatorëve ekonomikë “Egland Sh.p.k” dhe “BE-IS” Sh.p.k, me objekt “Ndërtimi rrjetit furnizimit dhe rrjetit shpërndarës Ujësjellësi dhe ndërtimi i rrjetit të KUZ, Lagja e vjetër, qyteti Bulqizë, Bashkia Bulqizë”, me vlerë të tenderit në shumën 322.439.000 lekë të reja, me afat kohor 10 mujor.
Alla në bashkëpunim me nënkryetaren e Bashkisë, dhe punonjësit e tjerë, si specialiste e prokurorimeve, anëtarët e KVO, kanë bërë të mundur që këtë tender ta fitonte me dokumentacion “BOE Egland shpk” dhe “BE-IS shpk”, duke krijuar avantazhe për këtë subjekt gjatë procedurës së prokurimit, shton SPAK në një njoftim zyrtar. Nga hetimi ka dyshime të arsyeshme të bazuara, se punimet janë kryer nga “OE 2AF Albania shpk”, lidhje shoqërore e kryetarit të Bashkisë.
“Kjo procedure prokurimi dyshohet që është inicuar dhe zhvilluar në kundërshtim me LPP dhe aktet nënligjore dhe nga AK Bashkia Bulqizë, konkretisht nga të hetuarit me veprime aktive që konsistojnë në ngritjen e një mekanizmi të posaçëm, për nxjerrjen fituese të një firme në lidhje me proceduren e prokurimit të zhvilluar nga Bashkia Bulqizë. Aktet deri në këtë fazë të hetimit njoftojnë se të hetuarit miratuan kritere për të favorizur një firmë pjesëmarrës në tender, firma pjesëmarrëse në prokurim paraqiste vetëm dokumetacionin, ndërkohë punimet realizoheshin nga i hetuari Aqif Konesha, i cili rezultoi lidhje e afërt e Kryetar i Bashkisë”, thuhet më tej në njoftim.
4 kompani të skualifikuara
“Boldnews.al” ka siguruar dokumentat e tenderit, që tregojnë se nga pesë kompanitë pjesëmarrëse u s’kualifikuan 4 prej tyre. Në fund, fitues u shpall bashkimi i operatorëve ekonomikë “EGLAND & BE-IS”.
Kompanitë e skualifikuara janë “GJOKA KONSTRUKSION”, “KUPA” dhe “2AF ALBANIA GROUP”, “LIQENI VII” dhe “SENKA”.
Prokuroria e Posaçme Kundër Korrupsionit dhe Krimit të Organizuar njofton se në funksion të hetimeve të këtij procedimi penal janë përdorur mjete dhe metoda speciale hetimi të alternuara këto me mjetet apo metodat tradicionale të hetimit.
AKUZAT
Personat nën arrest me burg:
- Lefter Alla, person i dyshuar për kryerjen e veprave penale “Shkelja e barazisë së pjesëmarrësve në tendera apo ankande publike”, parashikuar nga neni 258/2 e 25 i Kodit Penal dhe “Shpërdorimi i detyrës”, parashikuar nga neni 248 i Kodit Penal.
- Enkeleda Lleshi, person i dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, parashikuar nga neni 258/2 e 25 i Kodit Penal dhe “Shpërdorimi i detyrës”, parashikuar nga neni 248 i Kodit Penal.
- Rubin Kola, person i dyshuar per kryerjen e vepres penale “Shkelja e barazisë së pjesëmarrësve në tendera apo ankande publike”, parashikuar nga neni 258/2 e 25 i Kodit Penal.
- Erion Isaku, person i dyshuar per kryerjen e vepres penale “Shkelja e barazisë së pjesëmarrësve në tendera apo ankande publike”, parashikuar nga neni 258/2 e 25 i Kodit Penal.
- Leonard Daçi, person i dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, parashikuar nga neni 258/2e 25 i Kodit Penal.
- Arsen Gjoka, person i dyshuar për kryerjen e veprës penale “Shkelja e barazisë së pjesëmarrësve ne tendera apo ankande publike”, parashikuar nga neni 258/2 e 25 i Kodit Penal.
- Kujtim Zogu, person i dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, parashikuar nga neni 258/2 e 25 i Kodit Penal.
- Denis Xholi, person i dyshuar për kryerjen e veprës“Shkelja e barazisë së pjesëmarrësve në tendera apo ankande publike”, parashikuar nga neni 258/2 e 25 i Kodit Penal.
- Rasim Daci, person i dyshuar për kryerjen e veprës penale “Falsifikimi i dokumenteve”, parashikuar nga neni 186/2,3 i Kodit Penal.
- Dalo Gazidedja, person i dyshuar për kryerjen e veprës penale “Falsifikimi i dokumenteve”, parashikuar nga nenet 186/2,3 të Kodit Penal.
- Aqif Konesha, person i dyshuar për kryerjen e veprës penale “Falsifikimi i dokumenteve”,parashikuar nga neni 186/2,3 i Kodit Penal.
Personat nën arrest shtëpie:
- Kastriot Ibrahimaj person i dyshuar për kryerjen e veprës penale “Falsifikimi i formularve”,parashikuar nga neni 190/1 i Kodit Penal.
- Ana Nishku, person i dyshuar për kryerjen e veprave penale “Falsifikim i dokumenteve”, parashikuar nga nenet 186/2,3 të Kodit Penal.
Lexo edhe:
Avokati i Lefter Allës: Arrestimi lidhet me rikandidimin në zgjedhjet lokale
