Kryedemokrati Sali Berisha këtë të hënë ka hedhur akuza të forta në drejtim të kryeministrit Edi Rama, në lidhje me tentativën për të shkatërruar PD dhe për ta lënë jashtë zgjedhjeve lokale.
“Për të lënë PD-në jashtë zgjedhjeve, Rama bllokoi procesin zgjedhor deri 3 ditë para afatit të regjistrimit. Pikërisht për një gjë të tillë, dorëzoi me Elira Kokonën, shkresën që lexuan gjykatësit”, tha Berisha.
Në vijim Berisha tha se në lojë hyri “McGonigal me fustan”, duke ju referuar ambasadores Yuri Kim.
Pasi i bëri kërkesë DASH dhe autoriteteve më të larta në SHBA për hetimin e Ramës dhe Kim, Berisha nënvizoi se ata do të kenë fatin e ish-agjentit të kundërzbulimit në FBI.
“Pikërisht sepse ka lepurin në bark, kombinoi me McGonigalin me fustan, e cila në shkelje të të gjitha parimeve të vendit të saj dhe këtij vendi, u angazhuan në mënyrën më korruptive kundër Partisë Demokratike. Rama dhe Kim, të dy me mekanizmin McGonigal, do të dështojnë siç dështoi ai.
I bëj thirrje edhe njëherë, inspektorit të përgjithshëm të DASH, i bëj thirrje FBI-së, i bëj thirrje Kongresit të SHBA, për një hetim të plotë për të gjitha këto veprime antiligjore, antikushtetuese, që shkelmojnë konventat ndërkombëtare të ambasadores Kim.
Sikundër e garantoj Edi Ramën se asgjë nuk mund ta shpëtojë atë pa pasur fatin e McGonigal, jo në Amerikë, por në Shqipëri”, deklaroi ai.
