Kreu i KQZ-së, Ilirjan Celibashi pritej që të deklaronte në orën 11:00 vendimin që do të merrte ky institucion në lidhje me kërkesën e grupit “Alibeaj” për t’u regjistruar në zgjedhjet lokale të 14 majit me logon e Partisë Demokratike.
Por Celibashi doli përtej parashikimeve në konferencën me gazetarët, ku i është përgjigjur dhe pyetjes se kur përfundon afati prej 48 orësh që ai nga mbledhja e së enjtes në KQZ i la Lulzim Bashës për të paraqitur firmën mbi “deklaratën e angazhimit solemn të kryetarit të partisë politike”.
Teksa la të kuptohej se logoja e Partisë Demokratike rrezikon të mbetet e papërfaqësuar në zgjedhjet lokale për shkak të mungesës sipas tij të një dokumentacioni të plotë nga grupi “Alibeaj”, Celibashi njoftoi indirekt edhe shtyrjen me 12 orë të afatit për firmën e Lulzim Bashës si kryetar partie.
Ai deklaroi se vendimi do të jepet kur të mbarojë afati prej 48 orësh dhe sipas intepretimit ligjor të cilit kryetari i KQZ i referohet, ky afat është në orën 12:00 të mbrëmjes së sotme.
“Përgjigjja për pyetjen tuaj është vendimi që unë si komisioner do të marr pasi të ketë kaluar afati 48 orë që i është në lënë në dispozicion PD-së për të plotësuar dokumentacionin që në bindjen time është i mangët. Afati përfundon sot në mesnatë”, u shpreh ai.
Gazetarët patën interes të mësonin edhe fatin e anëtarëve të KZAZ-së, teksa KQZ çuditërisht miratoi mbrëmjen e djeshme listën e propozuar nga grupi “Alibeaj” edhe pse ky grupim ende nuk është regjistruar në zgjedhje.
I pyetur se votat e cilës parti do të mbrojnë këta anëtarë KZAZ-je në rast se vendimi final është që PD nuk hyn në zgjedhje, Celibashi u shmang me diplomaci duke thënë se “kur të kemi të dhëna dhe dokumentacionin përkatës do të kemi një përgjigje”.
Por, duke qenë se miratimi i listës me anëtarë të KZAZ propozuar nga PD e Alibeajt u pa si një hap më afër regjistrimit të tyre në zgjedhje, Komisioneri Shtetëror sqaroi se vendimi i mbrëmshëm u morr vetëm për të mos future në ngërç procesin zgjedhor dhe se është i ndryshëm nga kërkesa e një subjekti politik për regjistrim si subjekt zgjedhor.
“Dua të rikonfirmoj edhe një herë se vendimmarrja e KQZ dhe çfarë ndodh në KQZ është në përputhje me principin që ne aplikojmë sikurse është transparenca e plotë. Ajo vendimmarrje është e imponuar nga rrethanat, lidhet me procedurat që duhet të kryejnë KZAZ-të në bashkitë që kanë një KZAZ që lidhet me regjistrimin e komisioneve nismëtare për kandidatët e pavarur. Vendimet që lidhen me emërimin apo shkarkimin e anëtarëve të KZAZ-ve nuk bëhen gjithmonë në mbledhje publike. Bëhet publikisht vetëm emërimi fillestar.
Edhe në rastin në fjalë, ne i kishim emëruar më parë një pjesë të anëtarëve të KZAZ-ve,. Emërimi është bërë dje në minutën e fundit sepse është dashur të merrnin detyrën më së shumti sekretarët që kanë një rëndësi të veçantë për menaxhimin e procesit. Këtu nuk ka asnjë qëndrim tjetër tej atij që sapo e thashë.
Ne kemi emëruar anëtarë të KZAZ-së personat që është paraqitur nga personi që është legjitim në komunikimin me KQZ-së. Indrit Sefa si përfaqësues i PD ka gjithë legjitimin. Edhe Selia e PD ka legjitimin dhe ndaj ne atje dërgojmë shkresat. Se kush rri në Selinë e PD-së kjo nuk është çështja jonë. Për të mos pasur keqkuptim është e ndryshme nga çdo kërkesë tjetër dhe më së shumti për regjistrimin e një Partie politike në zgjedhje. Ne e bëjmë këtë sepse kështu duhet bërë, kështu e kërkon ligji”, argumentoi me pas Celibashi.
Por, pavarësisht këmbënguljes së Celibashit se dokumentacioni i paraqitur nga përfaqësuesi ligjor Indrit Sefa, nuk mjafton për të regjistruar PD me kryetar Bashën në zgjedhje pasi është i paplotë, vetë Enkelejd Alibeaj i është drejtuar me një letër kreut të KQZ, praditen e sotme, ku i kërkonte njohjen e dokumenteve pasi janë në përputhje me ligjin.
Gjithashtu përfqëues të grupit “Alibeaj” janë shprehur në unison në qëndrimin se Lulzim Basha është kryetari i dorëhequr, ndaj nuk nevojitet firma e tij.
LEXO EDHE:
