Një shpërthim i fuqishëm me tritol ka tronditur Laçin në orët e para të mëngjesit të sotëm. Mësohet se rreth orës 03:20 të kësaj të premteje një sasi e konsiderueshme e lëndës plasëse ka shpërthyer në banesën e Skënder Likës, në Sanxhak të Laçit.
Për shkak të shpërthimit janë shkaktuar dëme të konsiderueshme materiale, jo vetëm në banesën e Likës por edhe në shtëpitë e fqinjve të tij.
Policia ndodhet në vendin e ngjarjes, por ende nuk dihen motivet përse u tentua të hidhej në erë banesa.
Sa i përket të zotit të saj, Skënder Lika është babai i autorit të vrasjes së biznesmenit Rakip Roli dhe ka qenë po ashtu i arrestuar dhe akuzuar se ka qenë i përfshirë në ngjarjen me protagonist të birin e tij Llej Lika.
Po ashtu Skënder Lika është xhaxhai i Ilir Likajt (Xhepajt), i arrestuar për vrasjen e dy biznesmenëve në një hotel në Mamurras, përkatësisht të shtetasve Paulin Gjergji dhe Bujar Lika (ky i fundit pa lidhje farefisnore me autorin e vrasjeve).
Gjithashtu, Skënder Lika është vëllai i Myslim Likës, i cili është plagosur në një atentat në Mamurras.
Teksa ditën e sotme iu vendos tritol, dy vite më parë, më 20 shkurt 2021, Skënder Likës iu la mesazh kërcënimi te dera e shtëpisë.
Persona të paidentifikuar kishin vendosur në derën e banesës së Skënder Likës, 8 plumba. Pasi i pikasi plumbat, Lika bëri asokohe denonconim në polici, ndërsa vëllait të Skënderit, Myslim Likës iu bë atentat pak ditë para ngjarjes.
Pak muaj më pas, në dhjetor 2021 policia arrestoi Skënder Likën dhe djalin e tij, si dhe shokun e tij për vrasjen e Rakip Rolit.
Vrasja e Rolit
Ekzekutimi i Rakip Rolit ndodhi rreth orës 8:45 të datës 10 dhjetor 2021, në dalje të fshatit Sanxhaku, në rrugën që shkon për në Mamurras.
Biznesmeni u vra në shenjë hakmarrje për një sherr të 22-vjeçarit Llej Lika (i biri i Skënder Likës) me një prej djemve të tij, që ndodhi për një vajzë.
Fillimisht Lika dhe njëri nga vëllezërit Roli, janë konfliktuar verbalisht duke e sharë dhe ofenduar njëri tjetrin me fjalë të rënda. Sherri mes tyre ka agravuar, pasi është përfshirë edhe biznesmeni Roli dhe djali tjetër.
Dy vëllezërit, Sokol dhe Isuf Roli, së bashku me babanë e tyre, e kanë rrahur të riun brutalisht në një lokal në mes të fshatit teksa ky i fundit po qëndronte me miqtë e tij. Ata i kanë shkaktuar plagë të rënda, saqë për t’u shëruar 22 vjeçari është shtruar në spital.
Autorët kanë qenë në këmbë dhe kanë qëlluar me breshëri kallashnikovi ndaj Rolit në momentin që ai po kalonte me makinën e tij luksoze “Audi Q7”.
Pasi u qëllua disa herë, makina humbi kontrollin duke u përplasur me dy automjete të tjera që ndodheshin rastësisht aty, ndërsa biznesmeni morri 7 plumba në trup.
Për ngjarjen asokohe u arrestua Llej Lika, Skënder Lika dhe miku i 22-vjeçarit Klajdi Gjegjaj. Gjykata caktoi masën “arrest në burg” për babë e bir dhe Gjegjajn, ndërsa mbi ta rëndonin akuzat për vrasje me paramendim e kryer në bashkëpunim dhe armëmbajtje pa leje.
Por në dëshminë e tij Llej Lika tha se “vrasjen e kam bërë unë dhe babai e shoku im nuk kanë asnjë lidhje me ngjarjen”.
