KQZ shtyn regjistrimin e PD duke i lënë 48 orë afat për plotësimin e dokumentacionit.
Gjatë fjalës së tij, Celibashi ka pranuar se Basha ka të drejtën për të regjistruar Partinë Demokratike në zgjedhje lokale por i vendosi ultimatum që brenda 48 orëve të plotësojë dokumentacionin për të cilin thotë se ka probleme. Celibashi vlerësoi se autorizimit të dorëzuar nga Indrit Sefa i mungon qartësia.
Celibashi theksoi se në perceptimin e tij, Sali Berisha është kryetar i PD, por ligji njeh Lulzim Bashën.
“Nuk është KQZ që vendos se kush është përfaqësuesi i një partie politike, për aq kohë sa nuk është KQZ, këtë e merr nga një palë e tretë. E ka përcaktuar ligji i partive politike dhe kodi zgjedhor që përcakton se kush është organi që vendos për drejtimin e partive politike. Është gjykata dhe një dokument që vjen prej gjykatës që përcakton se kush është drejtuesi i një partie politike. Kjo është e qartë për këdo dhe është e kotë që të vazhdojmë diskutimet. Në nenin 9 të ligjit për partitë politike thuhet se regjistrimi i partive bëhet në shkallën e parë të rrethit Tiranë që mban edhe regjistrin e partive politike. Anëtarësia e një partie politike mund të njohin për drejtues të një partie këdo që ata çmojnë dhe vlerësojnë, por për ligjin dhe institucionet publike, përfshi edhe KQZ-në, ajo që merret në referencë është dokumenti zyrtar. Do të ishte shumë e dëmshme nëse KQZ do ta merrte këtë vendim bazuar mbi perceptime dhe fakte publike, për sa kohë që ekziston një dokument zyrtar që vërteton një fakt. Unë mund ta pranoj që në perceptimin tim Berisha është kryetar i PD-së, por nuk ndryshon asgjë në përputhje me ligjin pasi duhet të marr në konsideratë një dokument zyrtar të gjykatës. Të drejtën për të regjistruar PD-në, bazuar në dokumentet zyrtare që i janë vënë KQZ-së e ka Lulzim Basha. Ai figuron kryetar i PD-së. Keni 48 orë kohë për të plotësuar dokumentacionin i cili ka probleme. Autorizimi i dyshimte si i falsifikuar dhe ne shkelje te ligjit”, tha Celibashi.
Komisioneri Shtetëror i Zgjedhjeve, Ilirjan Celibashi e ktheu për plotësim dokumentacioni kërkesën e firmosur nga Basha për regjistrimin e Partisë Demokratike.
“Autorizohet Indrit Sefa që të kryejë formulimin, sa kohë ka vend që ta bëjë një formulim të dytë, do të thotë se mungon qartësia. Ka një mangësi, që lidhet me detyrimin personal për të nënshkruar deklaratën. Çdo kompetencë tjetër, sa kohë që ligji nuk ka vendosur më kufizime, përfaqësimi mundet të bëhet me përjashtim me atë që ligji ka ndaluar. Çdo kompetencë mund të delegohet. Deklarata e kryetarit të partisë nuk është kompetencë por përfaqësi, dhe nuk mund të delegohet. Duke e konkluduar të gjithë këtë arsyetim, unë vlerësoj se dokumentacioni i paraqitur nga përfaqësuesi i kryetarit të Partisë, Lulzim Basha nuk është i plotë ndaj do t’ju jap 48 orë kohë për t’i bërë plotësimet e kërkuara. Domosdoshmërisht për deklaratën e kryetarit të Partisë”, tha Celibashi.
Pas këtij vendimi, përfaqësuesi i grupimit të Alibeajt, Indrit Sefa kërkoi një kopje të vendimit pasi siç tha ai do ta apelojë kthimin e dokumentacionit.
