Ish-kreu i Bashkisë Lushnje, Fatos Tushe është arrestuar. Vënia në pranga nga policia vjen në kuadër të zbatimit të vendimit të gjykatës së Apelit të Posaçëm, që shtoi dënimin ndaj ish-kryebashkiakut.
Ditën e djeshme, Apeli ka fajësuar Tushen edhe për “shkelje të barazisë në tendera”, vepër për të cilën mori pafajësi në shkallën e parë. Si rezultat, Tushe u dënua me 3 vjet e 4 muaj burg, nga 2.4 që ishte dënuar me shkallën e parë.
Fatos Tushe u arrestua fillimisht më 6 korrik 2021, ndërsa në Janar të këtij viti u lirua pasi gjykata konstatoi përfundimin e dënimit.
Më 29 Korrik 2022, Gjykata e Posaçme njoftoi se kishte gjetur fajtorë ish-kryetarin e Bashkisë së Lushnjes Fatos Tushe, ish-nënkryetarin Gentian Nushi dhe 17 persona të tjerë, zyrtarë të bashkisë e biznesmenë, të përfshirë në abuzimet me një tender për kanalet vaditëse.
Fatos Tushe, u gjet i pafajshëm për akuzën e korrupsionit, por u cilësua fajtor nga Gjykata e Posaçme për shpërdorim detyre në dy raste. Ai u dënua me 3 vite 8 muaj burgim, që për shkak të gjykimit të shkurtuar konvertohen në 2 vjet e katër muaj. Tushes po ashtu iu hoq drejta për të ushtruar funksione publike për 5 vite. Gjykata tha se Tushe shpërdoroi detyrën për shkak se lejoi një ndërtim pa leje, si dhe abuzoi me karburantin e bashkisë.
Fajtorë u gjetën edhe 17 të akuzuarit e tjerë si të përfshirë në këtë çështje, përfshirë zyrtarë lokalë dhe biznesmenë.
Kryebashkiaku i Lushnjes, Fatos Tushe u arrestua në 6 korrik 2021 i akuzuar për veprën penale të “shpërdorimit të detyrës”. SPAK tha atëherë se i kishte nisur hetimet në vitin 2020 nga një referim i Policisë Gjyqësore për veprat penale të “korrupsionit pasiv”, “shkeljes së barazisë në tendera”, “shpërdorimit të detyrës” dhe “falsifikimit të dokumenteve”. Tushe, një ish-deputet i Partisë Socialiste e drejtoi Bashkinë e Lushnjes prej vitit 2011 deri kur u vu në pranga.
