Kryetari i Partisë së Lirisë, Ilir Meta, ka publikuar në Facebook një video nga fjala e tij në protestën e djeshme përpara Kuvendit. Ai flet për gjendjen e vështirë ekonomike në të cilën jetojnë shumica e qytetarëve shqiptarë dhe ka akuzuar qeverinë Rama se i urren njerëzit e thjeshtë, të varfër dhe të ndershëm.
Meta ka krahasuar mbështetjen që qeveria shqiptare jep për qytetarët e saj me një vend si Kosova fqinje, e cila ka gjysmën e buxhetit të Shqipërisë, por jep dyfishin e mbështetjes për shtresat më të dobëta.
“Buxheti vjetor i Shqipërisë është dy herë më i lartë se sa buxheti i Kosovës. Por në Shqipëri, ndihma ekonomike dhe pensionet janë shumë më të ulëta se sa në Kosovë, sepse paratë e shqiptarëve shpërdorohen nga korrupsioni i shfrenuar qeveritar.
Kjo qeveri i urren shqiptarët e thjeshtë.
Kjo qeveri i urren shqiptarët e varfër dhe të ndershëm. Ajo është armike e interesit publik, prandaj ajo duhet të largohet një orë e më parë.”- shkruan Meta krahas videos të shpërndarë në Facebook.
