Ish-zëvendëskryeministri Arben Ahmetaj deklaroi këtë të Enjte se s’ka hedhur asnjë firmë te procedura për dhënien e tre inceneratorëve në vend.
“Kush gabon rrugë, ose i merr koka erë dhe bashkë me qëllimet e shpallura kërkon të realizojë gjëra, qëllime të tjera, do ti dalë për zot vetë pastaj”. Kjo ishte një pjesë e deklaratës që bëri kryeministri Edi Rama një javë më parë në emisionin “Opinion” kur u pyet lidhur me ish-zëvendësministrin Arben Ahmetajt.
Një koment për deklaratat e Ramës, në të njëjtin emision këtë të Enjte, iu kërkua Arben Ahmetajt.
Ky i fundit tha se s’ka asnjë firmë në procedurat për asnjë nga tre inceneratorët në vend.
“Jeni i gatshëm ti dilni për zot vetes se km iu ka lëshuar”, u pyet Ahmetaj, ndërsa iu lexua edhe një përgjigje e SPAK drejtuar mediave ku organi i akuzës shprehet se “…objekt i hetimeve janë një sërë rrethanash që përfshihen veprimet e Arben Ahmetajt”.
“Ka një dosje 237/1 që kanë të bëjnë me procedurën. Në procedurën e inceneratorit të Elbasanit, Fierit dhe Tiranës unë s’kam marrë pjesë. Kam zero përfshirje. Patjetër që po hetohet. Tek inceneratori i Elbasanit kam zero përfshirje në procedurë. Unë s’kam firmë te inceneratori i Elbasanit, Fierit dhe Tiranës. Të dyja veprat publike Elbasani dhe Fieri janë të domosdoshme, po pastrojnë qytetin”, tha ai.
I pyetur nëse kishte njohje të mëparshme me Klodian Zoton dhe Stela Gugalljan, të dy në kërkim për aferën e inceneratorëve, Ahmetaj mohoi.
Drejtuesi i emisionit i tregoi një korrespondence që Ahmetaj ka pasur me Erion Veliajn, kryebashkiakun e Tiranës, për inceneratorin e Tiranës.
“Firma është e Erion Veliajt, mund ta pyesnit kryeministrit për Erion Veliajn. Ahmetaj u thotë institucioneve financojini vetë”, u përgjigj ai.
Shkresën kur mbante detyrën e ministrit të Zhvillmit Ekonomik dhe Tregtisë, ku shprehte dakordësinë për inceneratorin e Elbasanit, e quajti “pa vlerë procedure”:
– Blendi Fevziu: Në lidhje me shkresën tuaj dhe të ndërtimit dhe administrimit të impiantit të trajtimit të mbetjeve urbane të qarkut Elbasan për prodhimin e energjisë në procedurën përzgjedhëse me negocim pa shpallje paraprake të njoftimit të kontratës që i jepet shoqërisë Albtec SHPK shprehemi parimisht dakord.
– Arben Ahmetaj: Kjo letër ka vlerën nul nga ana e procedurës sepse nuk ka i referohet procedurës, nuk ndodhi kurrë vendimi i qeverisë dhe kërkohet mendim për projektimin për përcaktimin e autoritetit kontraktues, dhe kjo letër ka vdekur.
