Nisma Thurrje shprehet kundër marrëveshjes mes Shoqatave të Autoshkollave, Drejtorisë së Përgjithshme të Tatimeve dhe asaj të Transportit Rrugor për rritjen e çmimeve të patentave.
Në një reagim publik, “Nisma” thotë se vendimi sjell prishjen e konkurrencës dhe “fut duart” në xhepat e shqiptarëve.
Nisma Thurrje paralajmëron kallëzim të marrëveshjes tek Autoriteti i Konkurrencës, ndërsa zyrtarët publik në Prokurori.
Reagimi
Nisma Thurrje shprehet se Drejtori i Transportit Rrugor, Blendi Gonxhe, sot duhet të ishte duke dhënë llogari për kallëzimin që i ka bërë Nisma Thurje në SPAK, para dy viteve. “Por jo, ai sot është në Televizor duke promovuar publikisht një marrëveshje, që i ka gjasat të jetë produkt i një vepre tjetër penale”, thuhet më tej në reagim.
Nisma Thurrje sjell në vëmendje edhe rritjen në shifra që parashikon marrëveshja e re:
“Patentat deri dje kushtonin rreth 35 mijë lekë (të reja). Sot, të rinjtë do duhet të paguajnë 50 mijë lekë (të vjetra) më shumë për tu pajisur me patentë. Shqipëria, e cila ka rrogat më të ulëta në rajon, ka sot çmimin më të lartë të patentave në Ballkan. Asnjë nga vendet fqinje nuk paguan 850 mijë lekë për një patentë të klasit të ulët. Ky është kulmi”.
“Në çdo vend të zhvilluar shteti tenton të vendos çmime tavan kur ato rriten përtej logjikës së tregut. Në Shqipëri shteti prish konkurencën duke vendosur cmime dysheme, që detyrojnë autoshkollat të mos i ofrojnë shërbimet më lirë se sa ua cakton shteti (?!) Ky është rasti kur shteti, pasi futet në xhepat e disa bizneseve, fut duart në xhepat e shqiptarëve. Ne jemi kundër rritjes së çmimit të patentës, pasi këto çmime janë të papërballueshme për familjet e zakonshme Shqiptare. Ne jemi kundër rritjes së çmimit, sepse ato rëndojnë pikërisht tek të rinjtë, të cilët janë grupmosha që po humbasim më shumë përmes emigrimit. Duket sikur kjo qeveri e ka ndarë mendjen të përzërë edhe ata të rinj që duan të rijnë këtu, duke ua bërë çdo ditë e më të vështirë. Por mbi të gjitha ne jemi kundër marrëveshjeve për të vendosur çmime dysheme, sepse ato nuk lejojnë konkurrencën e lirë. Me fjalë të tjera, pas kësaj marrëveshjeje një autoshkollë nuk do të lejohet ta ofrojë më lirë kursin e patentës, edhe nëse do të dojë ta ulë çmimin. Prandaj nëpër vënde demokratike marrëveshje të tilla ndalohen me ligj dhe dënohen sa herë që zbulohen. Por nuk është parë e dëgjuar që marrëveshje të tilla të iniciohen nga vetë shteti”, shprehet Nisma.
“Prandaj ne si Nisma Thurje, po përgatisim dokumentacionin e nevojshëm për ta kallëzuar marrëveshjen tek Autoriteti i Konkurrencës, ndërsa zyrtarët publik në Prokurori”, mbyllet reagimi.
