Nga Boldnews.al
Kryeministri Edi Rama e çon çmendurinë e tij deri në fund, duke detyruar Fondin Shqiptar të Zhvillimit të shpallë fituesin e instalacionit 4 milionë euro në oborrin e brendshëm të kryeministrisë. Një projekt i kotë, pasi me kaq shumë para do të ndërtohet vetëm një strukturë druri, e cila do t’u shërbejë vetëm punonjësve të këtij institucioni për t’u shlodhur.
Por, megjithë këto kontestime, Agolli duket se ia ka bërë “qejfin” Ramës. Fillimisht FSHZH-ja e anuloi këtë tender, me arsyetimin se s’kishte firma të interesuara dhe kishte disa përllogaritje gabim. Gjithçka ngjasoi me një zmbrapsje të Ramës-Agollit, por ata e rishpallen tenderin me të njëjtën vlerë.
Natyrisht, duke ftuar firmat e preferuara të qeverisë që të bëheshin pjesë e këtij tenderi. “Kërcënimet” duket se ia vlejtën, pasi tenderi i radhës u bë normalisht, madje me të njëjtin objekt dhe vlerë. Dhe kush duhet të fitonte?!
Normalisht një firmë e cila ka qenë shumë afër qeverisë. Një nga firmat që ka bërë namin me tenderat e Bashkisë së Tiranës, ndërkohë që kohët e fundit është fokusuar në disa projekte në Vlorë, atje ku është deputet edhe kryeministri jonë.
Sipas dokumenteve që disponon BoldNews.al, FSHZH-ja ka finalizuar tenderin me objekt “Instalacion me strukturë druri në oborrin e brendshëm të Kryeministrisë, ‘Parku Eden'”. Fondi limit total i marrëveshjes kuadër ka qenë 431.403.183 lekë pa TVSH, ndërsa kohëzgjatja e kontratës është 6 muaj.
“Me anë të këtij njoftimi ju informojmë se, në këtë procedurë kanë marrë pjesë në fazën e dytë ‘ARKONSTUDIO’ me vlerë 431.400.000 lekë pa TVSH. Gjithashtu edhe firma ‘FUSHA’ me një vlerë të ofertës prej 398.478.729 lekë pa TVSH” thuhet në këtë dokument.
Në verën e kaluar, BoldNews.al investigoi dokumentet e këtij tenderi të shpallur nga Fondi Shqiptar i Zhvillimit. Sipas Fondit, oborri i Kryeministrisë është pa funksion dhe i pa trajtuar. “Kjo hapësire përbën një potencial të madh për ta kthyer këtë hapësirë në një arenë funksionesh dhe eventesh të reja me një dizajn bashkëkohor dhe tërheqës” shkruhet në dokumente. Më tej shkruante se “hartimi i projektit është detajuar mbi bazën e konceptit, të formuluar nga studioja ndërkombëtare e projektimit ‘Studio Precht’, me zyrat qendrore në Austri”.
Sipas saj, koncepti i ‘Eden-it’ është përgjigje e situatës që krijohet në oborr. “Në vend që të vendoset një kopësht në tokë, krijohet një kopësht 3-dimensional që siguron funksione rekreacioni, gjallërie dhe kohe të lirë në nivele të ndryshme. Eden është një zgjidhje e qëndrushme dhe e gjallë për një oborr që krijon vend, një strukturë e hapur dhe e depërtueshme për kohë të lirë private dhe evente publike, një spektakël i bërë nga njëriu, dhe një përkujtuese ndaj natyrës së humbur prej kohësh në mjediset tona të ndërtuara”, thuhet në këto dokumente.
Fondi shkruante se dizajni i ndjekur në hapësirën e depërtueshme të Eden-it lejon zhvillimin e programeve dhe eventeve publike të ndryshme. Pra, do të jetë një propagandë nga ana e kryeministrisë apo e vetë Ramës, i cili dita-ditës po e ndjen veten si një “Erdogan” apo “Putin” i Shqipërisë.
