Hetimet për ish-agjentin e Operacionales Jeton Lami, i cili u arrestua pasi u zbulua nga kamerat e sigurisë se kishte shoqëruar të shumëkërkuarin e drejtësisë Ervis Martinaj, janë mbyllur nga Prokuroria e Kurbinit.
Në përfundim të 6 muajve Prokuroria ka vendosur të ngrejë akuzën e “shpërdorimit të detyrës” ndaj Lamit, duke arsyetuar se ai kishte detyrë funksionale të arrestonte personat e shumëkërkuar, por në vend të kësaj ishte shndërruar në “truprojën” e Martinajt, duke i garantuar lëvizjen e lirë pa rënë në radarët e policisë.
Sipas News24 prokurori i çështjes ka shkuar në ambientet e paraburgimit të sigurisë së lartë ku mbahet Jeton Lami, duke i komunikuar akuzat pak ditë më parë.
Tashmë sipas ligjit është duke u pritur afati 10-ditor që avokatët e Jeton Lamit të kthejnë pretendimet e tyre sikurse e parashikon procedura dhe më pas dosja penale pritet t’i dorëzohet gjykatës për gjykim paraprak.
Me shumë gjasë, Lami do të gjykohet në Gjykatën e Lezhës për shkak të hartës së re gjyqësore. Sakaq, bëhet me dije se Jeton Lami pas 6 muajsh ka pranuar të flasë duke dhënë disa shpjegimi për raportin e tij me “mbretin” e lojërave të fatit, që rezulton i zhdukur prej muajit gusht të vitit të kaluar.
Pak ditë më parë ish-agjenti i policisë ka thyer heshtjen duke i shpjeguar prokurorit të çështjes disa detaje lidhur me shoqërimin e Ervis Martinajt, por ka refuzuar të ketë dijeni për zhdukjen e tij.
“Ervis Martinajn e kam njohur 10 vite përpara. Me atë nuk kam pasur asnjë miqësi apo lidhje të ngushtë. Megjithatë tre ditë para se ta shoqëroja në Durrës, e kam takuar rastësisht tek një ambient te Zogu i Zi. Më ka kërkuar ta shoqëroja. E kam shoqëruar në drejtim të Durrësit dhe e kam dërguar në një hotel ku u takua me një mikeshën e tij. Të nesërmen kam shkuar sërish në Durrës, e kam marrë Ervis Martinajn dhe mikeshën e tij dhe i kam lënë në një ambient pranë një karburanti në zonën e Vorës. Aty sipas informacioneve që kisha Ervis Martinaj do të bënte disa takime. Në atë moment jam shkëputur me të dhe nuk kam asnjë dijeni se çfarë ka ndodhur me të”, ka deklaruar për prokurorin Jeton Lami.
