Mbi 50 persona janë mbledhur në Gjykatën e Lartë Lindore në Danimarkë për të apeluar vendimin për burg, pasi janë arrestuar për trafik të kokainës në dhjetor të vitit 2021.
Midis tyre janë 10 shqiptarë të cilët kanë apeluar për t’u shpallur të pafajshëm ose për të marrë dënim më të ulët. Aktualisht të gjithë ndodhen në paraburgim. Ata akuzohen për përfshirjen në një grup të madh kriminal të drogës, ku autoritetet daneze sekuestruan mbi 2.7 ton kokainë, raporton AvisenDanmark.
Princi, Qero, Bjondi dhe Kuksi janë disa nga nofkat e shqiptarëve, të cilët kanë apeluar vendimin e gjykatës.
Mediat vendase shkruajnë se njëri prej shqiptarëve ka një karrierë të gjatë në Ministrinë e Mbrojtjes dhe Mjedisit në Shqipëri.
Në krye të hierarkisë, sipas aktakuzës, ishte një burrë që dyshohet se për disa vite jetonte nën një identitet të rremë me gruan e tij dhe djalin e vogël të çiftit në një pronë në Oliefabriksvej në Kastrup.
Gjykata e qarkut e njihte Sokol Krasnicin, emri i vërtetë i të cilit sipas gjykatës së rrethit është Jetmir Kastrati, fajtor për 920 kilogramë kokainë. Dënimi ishte 19 vjet e katër muaj burgim.
Në Gjykatën e Lartë, prokurorët do të përpiqen ta dënojnë atë për 2.7 ton kokainë në total, që është afërsisht një e treta e akuzës fillestare.
Pretendimi është se për disa vite rrjeti organizoi shpërndarjen e kokainës – gjithashtu në Norvegji dhe Suedi.
Një nga të pandehurit drejtonte një restorant në Malmö. Mësohet se paratë që grupi kriminal përfitonte nga tregtimi i drogës, i investonin në biznese të ndryshe, psh. disa hapën një fermë pulash e disa të tjerë dyqane suvenieresh.
Gjykata ka caktuar në total 55 seanca, ndërsa në tetor pritet të vendosë nëse vendimi do të ndryshohet apo jo.
