Gjashtëmbëdhjetë vite e tetë muaj burgim në total kërkon Prokuroria e Posaçme për kunatin dhe shoferin e Rezart Taçit për dosjen e “pastrimit të parave të mafias italiane”. Ndërkohë, për Rezart Taçin, çështja po gjykohet veçmas.
Këtë të Enjte, në Gjykatën e Posaçme për Korrupsionin dhe Krimin e Organizuar u zhvillua seanca e radhës për çështjen penale në ngarkim të të pandehurve Artur Balla dhe Bledar Lilo, të dy të akuzuar për veprat penale “Pastrimi i produkteve të veprës penale ose veprimtarisë kriminale”, “Grupi i strukturuar kriminal”, “Kryerja e veprave nga grupi i strukturuar kriminal”.
Në këtë seancë, SPAK ka kërkuar deklarimin fajtor të kunatit të Taçit Artur Balla dhe dënimin e tij me 13 vjet burgim. Për shkak të zhvillimit të procedurës së gjykimit të shkurtuar, ulet 1/3 e dënimit dhe si rrjedhim është kërkuar përfundimisht dënimi i të pandehurit me 8 vjet e 8 muaj burgim.
Po ashtu, SPAK ka kërkuar deklarimin fajtor të shoferit të Taçit, Bledar Lilo dhe dënimin e tij me 12 vjet burgim. Për shkak të zhvillimit të procedurës së gjykimit të shkurtuar, ulet 1/3 e dënimit dhe si rrjedhim është kërkuar përfundimisht dënimi i të pandehurit me 8 vjet burgim.
Gjithashtu, është kërkuar konfiskimi dhe kalimi në favor të shtetit i shumës monetare prej 18,399,941.50 (tetëmbëdhjetë milion, e treqind e nëntëdhjetë e nëntë mijë, e nëntëqind e dyzet një, pikë pesëdhjetë) Euro, ndodhur në llogarinë bankare në emër të Francesco Zummo, në Bankën Alpha, Tiranë, të sekuestruara gjatë fazës së hetimit paraprak nga Prokuroria e Posaçme.
Taçi gjykohet veçmas
Ndërkohë, për çështja për Taçin është ndarë gjatë fazës së seancës paraprake dhe do të gjykohet si çështje penale më vete. Shkak, shpjegon SPAK, është se ky i pandehur është në mungesë dhe duhet të kryhen procedurat e nevojshme të parashikuara në Kodin e Procedurës Penale për të pandehurit që gjykohen në mungesë.
Vetë Rezart Taçi, i cili ndodhet në kërkim policor, në një reagim për mediat nga arratia, është vetdeklaruar i pafajshëm.
Hetimet
Sipas akuzës, është arritur në përfundimin se të pandehurit Rezart Taçi, Artur Balla dhe Bledar Lilo, në bashkëpunim me shtetasit italian Francesco Zummo, Fabio Petruzzella, Daniele Cestagalli dhe disa persona të tjerë, në bashkëpunim me njëri tjetrin në formën e grupit të strukturuar kriminal, kanë organizuar një skeme komplekse financiare të kundraligjshme, të shtrirë në disa shtete të ndryshme, që ka pasur si qëllim pastrimin e një shume monetare të konsiderueshme që përbën produkt të veprimtarisë kriminale.
“Pjesë e kësaj skeme financiare, me ndihmën e shtetasve shqiptarë të përfshirë, ka qenë edhe kryerja e disa veprimeve dhe transaksioneve bankare në një bankë të nivelit të dytë në Shqipëri, veprime të cilat janë realizuar vetëm pjesërisht dhe nuk është arritur që të realizohen plotësisht, për shkak të veprimeve hetimore të kryera. Janë mbledhur prova se ndihma në këtë rast për transferimin dhe fshehjen e shumës monetare është bërë kundrejt premtimit për marrjen e përqindjes së caktuar të përfitimit monetar, në raport me shumën monetare që është transferuar në Shqipëri dhe që do të vijonte të transferohej në vende të tjera”, sqaronte SPAK në njoftimin për mbylljen e hetimeve për dosjen.
Një hetim për çështjen po zhvillohet në Itali, ku në qendër është Francesko Zummo, sipërmarrës italian nga Palermo, i lidhur me organizatën mafioze Cosa Nostra-n. Llogaria bankare në Shqipëri ku në Dhjetor 2021 u sekuestruan më shumë se 180 mln euro, ishte pikërisht në emër të Zummo-s.
