Kryetari i Partisë Demokratike Sali Berisha ka zbuluar mbrëmjen e sotme detaje nga ajo që në takimet me qytetarët e ka quajtur “pengmarrja” e Lulzim Bashës nga Edi Rama nëpërmjet aferës McGonigal.
Teksa për dy ditë radhazi lideri i opozitës ka zbuluar detaje nga strategjia e Ramës për të asgjësuar PD-në, duke kërcënuar Lulzim Bashën me dënimin me 6 vite burg dhe kontrollin e ish-kreut të PD nëpërmjet dosjes së financimeve ruse, të cilën nuk e dërgoi në Gjykatën e Lartë, Berisha zbuloi sot se ka pasur tentativë edhe për një kolacion me bazë të gjerë PS-PD.
“Javën e fundit të zgjedhjeve mua më ka ardhur në zyrë këshilltari kryesor elektoral dhe më thotë, në qoftë se s’fitohen zgjedhjet çfarë mendon për një koalicion me Partinë Socialiste, i them unë nuk e mbështes, por në qoftë se bëhet do bëj gjithçka kundra tij. Kaq ishte biseda me të”, tha Berisha në emisionin “Noë me Erla Mëhillin”.
Ndër të tjera Berisha u ndal edhe te protesta e 11 shkurtit, e cila sipas tij do të nxjerrë të gjithë Shqipërinë në rrugë.
“Me ndjesitë dhe perceptimet që kam, informacionet që marr, Shqipëria do marshojë drejt Tiranës, Tirana e tërë do të derdhet në rrugë. Nuk ka gjë më të vështirë se të përcaktosh numrin, por do të jetë një det njerëzish që se ka parë kurrë ndonjëherë, pasi problematika për të cilën është thirrur kjo protestë çdo shqiptar”, u shpreh Berisha.
Pritshmëritë e Partisë Demokratike për protestën e 4 kombëtare që Berisha ka thirrur pasi u rikthye në drejtimin e saj duket se janë tepër të mëdha, pasi edhe në kërkesën për leje për tubim që i është bërë Policisë së Shtetit theksohet se rreth 100 mijë qytetarë do të marrin pjesë në protestë.
