Një grup që merrej me shpërndarje droge është goditur nga policia e Tiranës, që ka arrestuar katër persona. Sipas hetimeve, në krye ishte një grua 40-vjeçe, pjesë e personave të vënë në pranga. Ndërkaq, policia ka shpallur në kërkim furnizuesin e grupit.
Sipas burimeve zyrtare, 6 kilogramë heroinë e kokainë dhe 1100 doza heroinë e kokainë si dhe shuma të mëdha parash në euro dhe lekë janë sekuestruar në kuadër të operacionit të koduar “Kutia e Pandorës”, që erdhi pas një hetimi disajavor me metoda proaktive.
Arrestimet
Policia njoftoi se nga Seksioni për Hetimin e Narkotikëve në Drejtorinë Vendore të Tiranës, bazuar dhe në inteligjencën informative se një grup kriminal shpërndante me shumicë dhe në doza lëndë narkotike heroinë e kokainë, referuan materialet në Prokurorinë e Rrethit Gjyqësor Tiranë e cila regjistroi procedimin penal në janar të këtij viti.
Si rezultat i hetimit disajavor nën drejtimin e Prokurorisë së Rrethit Gjyqësor Tiranë, u bë e mundur grumbullimi i provave të nevojshme për pjesëtarë të një grupi kriminal që shpërndanin lëndë narkotike heroinë e kokainë në zona të ndryshme të Tiranës.
Bazuar në këto prova u organizua dhe finalizua operacioni policor i koduar “Kutia e Pandorës”, në kuadër të së cilit u kapën dhe u arrestuan në flagrancë:
- Brikena Frakulli, 40 vjeçe, banuese në Tiranë drejtuese e grupit kriminal
- Hortenca Biçaku, 41 vjeçe, anëtare e grupit kriminal
- Artur Kristo, 45 vjeç, anëtar i grupit kriminal
- Klevi Banushi, 20 vjeç, anëtar i grupit kriminal.
Nga kontrolli i ushtruar në banesat e Brikena Frakullit dhe Artur Kristos, Policia gjeti dhe sekuestroi në cilësinë e provës materiale 6 kilogramë lëndë narkotike heroinë e kokainë, përkatësisht 3 kg 891 gramë e dyshuar heroinë dhe 2 kg e 110 gram lëndë narkotike kokainë, ku një pjesë ishte e ndarë në 1100 doza gati për shitje.
Gjithashtu, nga kontrolli u gjetën dhe u sekuestruan dhe shuma të mëdha parash në euro dhe lekë, konkretisht 83.555 euro, 420.000 lekë të rinj, 2 automjete, 2 motoçikleta, 3 peshore elektronike dhe 4 aparate celulare.
Hetimet
Nga hetimit e kryera, sipas të njëjtave burime, rezulton se këta persona vepronin në formën e grupit kriminal që drejtohej nga Brikena Frakulli, e cila siguronte lëndën narkotike në sasi të mëdha dhe më pas furnizonte shpërndarësit në doza.
Po nga hetimet është bërë e mundur që të identifikohet edhe personi që furnizonte me sasi kokaine e heroine Frakullin.
“Por për arsye hetimi nuk bëjmë me dije të dhëna pasi operacioni është në vijim për kapjen dhe vënien para përgjegjësisë ligjore të personave të tjerë të implikuar në këtë veprimtari kriminale”, thuhet në njoftimin e bluve.
Lexo edhe:
Kush është Brikena, koka e grupit të drogës në Tiranë, e arrestuar dhe në 2015
