Mungesa në Kuvend nuk e pengoi aspak Sali Berishën për të shprehur qëndrimin e tij për aferën McGonigal dhe mungesën e Edi Ramës në sallën e seancave plenare për t’u përballur me deputetët e opozitës.
Kreu i PD thirri menjëherë pas seancës një mbledhje të Grupit Parlamentar në selinë blu, nga ku foli për mediat dhe tha se Edi Ramae ose duhet të japë dorëheqjen, ose do të përballet me probleme të mëdha, duke nisur që nga protesta e 11 shkurtit.
“Përgëzojmë deputetët që kanë firmosur në ngritjen e këtij Komisioni Hetimor. Siguroj se Komisioni ynë do bëhet gjithçka për të zbardhur çdo detaj nga veprimtaria kriminale e Ramës, McGonigal në Shqipëri dhe grupit të tyre. Duhet të dini se jo vetëm në këtë fushë, por dhe në aspekte të tjera kanë luajtur me interesat jetike të SHBA. Mos prisni nga SKAP-i i partisë, McGonigal është ulur këmbëkryq me të. Ne kemi thirrur më 11 shkurt protestën më të madhe të vendit, ju nuk mund të dështoni në rrëzimin e Ramës nga pushteti. Ai nuk jep dorëheqje dhe nuk njeh gjuhë tjetër veç frikës, dhe ju duhet dhe do dëshmoni se, ose dorëheqjen ose do përballet me probleme shumë madhore”, tha Berisha.
Lideri i selisë blu nuk u ndal me kaq, pasi foli me emra duke akuzuar disa ministra të qeverisë Rama se janë implikuar në skandalin e korruptimit të zyrtarit të FBI-së.
Teksa për Sekretarin e Përgjithshëm të PS, Damian Gjiknuri dhe kryebashkiakun e Tiranës Erion Veliaj i kishte akuzuar më herët, njërin si përfaqësues të interesave ruse dhe oligarkut Oleg Deripaska në Shqipëri, e tjetrin se ka udhëtuar në SHBA për të fshehur të dhënat për të, Berisha sot nxori në dritë edhe emrin e Belinda Ballukut.
Sipas kreut të PD, zv/kryeministrja dhe kreu i AMP-së, Ardi Veliu kanë takuar Charles McGonigal.
“Ballukja ka qenë si të thuash nga më aktivet në këtë aferë, por janë edhe ministra të tjerë. Ardi Veliu, Bledi Çuçi, që të gjithë këta. I përgëzoj të gjithë deputetët që kanë firmosur në këtë Komision Hetimor Parlamentar dhe e siguroj Komisionin Hetimor Parlamentar të Kongresit të SHBA se komisioni ynë do të bëjë gjithçka për të zbardhur veprimtarinë kriminale të Edi Ramës, të McGonigal në Shqipëri, të Marco Ross-it dhe grupit të tyre. Duhet të dini se, jo vetëm në këtë fushë, por edhe në aspekte të tjera, këta aventurierë kanë luajtur me interesa të një rëndësie jetike për SHBA. Komisioni do t’i rreshtojë të gjitha këto, si një detyrim madhor ndaj SHBA. Mos prisni nga SKAP-i i partisë. Mc Gonigal është ulur këmbëkryq me ta. Jo një herë, por disa herë. Hetimin më të plotë do ta bëjë komisioni hetimor parlamentar”, zbuloi ai.
