Shqipëria ishte kthyer në një “Big Brother” të frikshëm ku bandat kriminale monitoronin jo vetëm lëvizjet e policisë por edhe kishin kontroll të vazhdueshëm duke shkelur privatësinë e qytetarëve të zakonshëm të vendit.
Policia bën me dije se po vijon çmontimin e këtyre kamerave “spiune” në Tiranë dhe në disa qytete të tjera të vendit. Së fundmi në kryeqytet janë hequr 65 kamera ndërsa nisën hetimet për 7 persona. Siç njofton policia në total në Tiranë janë çinstaluar 220 kamera ndërsa personat e vënë në hetim janë 44.
Këto kamera janë të vendosura nga grupet kriminale, me qëllim sigurimin e informacioneve.
“Shkon në 220 numri i kamerave të çmontuara dhe në 44 numri i shtetasve për të cilët janë iniciuar hetime të thelluara.
Strukturat hetimore të DVP Tiranë, në bashkëpunim me Komisariatet e Policisë në varësi të saj, çmontuan së fundi, 65 kamera të vendosura në kundërshtim me ligjin, si dhe iniciuan hetimet për 7 shtetas, për ndërhyrje të padrejta në jetën private.
Më herët, nga strukturat e DVP Tiranë janë çmontuar 155 kamera dhe u iniciuan hetimet për 37 shtetas të tjerë.
Strukturat hetimore të DVP Tiranë, në bashkëpunim me Komisariatet e Policisë në varësi të saj, në zbatim të detyrave të përcaktuara në kuadër të planit operacional mbarëkombëtar, të koduar “Fijet”, i iniciuar nga Drejtoria e Përgjithshme e Policisë së Shtetit, si dhe me mbështetjen e inteligjencës informative, për vendosjen e paautorizuar të disa kamerave, në disa lagje të Tiranës, me qëllim sigurimin e informacioneve, për qëllime kriminale, si dhe për të monitoruar lëvizjet e Policisë, kanë organizuar punën për evidentimin dhe çmontimin e këtyre kamerave, identifikimin e pronarëve të tyre, si dhe për dokumentimin e plotë ligjor të qëllimit të përdorimit.
-Në zbatim të këtij plani operacional, në Rrugën e Vilave, “Azem Hajdari”, “Azem Galica”, “Europa”, “Sabri Preveza”, “Sarina”, “Staf Melani”, “Ali Kelmendi”, janë çmontuar 65 kamera. Në vijim të veprimeve procedurale për këto raste, janë iniciuar hetimet për shtetasit I. D., J. M., A. P., E. L., M. B., F. Ll. (L)., F. A., L. Rr., dhe I. K”, njofton policia.
Materialet i kaluan Prokurorisë, për veprime të mëtejshme.
