Detaje të reja kanë dalë në dritë, nga arrestimi i ish-zyrtarit të lartë të FBI-së, Charles McGonigal.
Sipas dosjes hetimore në SHBA, McGonigal, ish-shefi i kundërzbulimit të FBI-së, ka mbajtur marrëdhënie të vazhdueshme me kryeministrin Edi Rama, të cilit i ka bërë dhe një dhuratë me logon e FBI-së gjatë një takimi të zhvilluar në Tiranë më 9 shtator të vitit 2017.
Në pikën 21 të akt-akuzës thuhet:
“Më 9 shtator 2017, në Shqipëri, i pandehuri McGonigal është takuar me personin B dhe kryeministrin e Shqipërisë. Me kërkesë të personit A, i pandehuri McGonigal i kërkoi Kryeministrit të Shqipërisë që të ishte i kujdesshëm për dhënien e licencave për shpimin e vendburimeve të naftës në Shqipëri për kompanitë ruse të frontit. Personi A dhe personi B kishin të dy interes financiar në vendimet e Qeverisë së Shqipërisë për dhënien e licencave të shpimit të fushës së naftës. I pandehuri McGonigal i ka dhënë Kryeministrit të Shqipërisë një suvenir me logo të FBI-së në prani të personit B”.
Ndërkohë kujtojmë se, Charles Mcgonigal u arrestua dje për pastrim parash të një oligarku rus dhe një shume prej 225 mijë dollarësh pagesave të marra nga një këshilltar i cilësuar si “joformal” i kryeministrit shqiptar, Edi Rama.
Një skandal i raportuar në mënyrë masive nga mediat më të mëdha amerikane ka ngritur dyshime të forta se Edi Rama ka paguar para të padeklaruara në favor të një ish zyrtari të lartë të FBI-së, për ta përdorur atë në favor të luftës së brendëshme politike në Shqipëri.
