Megjithëse korrupsioni ka prekur kulmin në administratë dhe kabinetin qeveritar, kjo nuk e ndali ambasadoren e SHBA në vendin tonë, Yuri Kim që të bëjë një deklaratë të papritur.
Gjatë një interviste për Sokol Ballën, Kim deklaroi se zyrtarë të qeverisë nuk i zë gjumi natën për shkak të frikës se po shpallen “Non Grata” nga SHBA-ja ose do të ndiqen penalisht. Sipas guvernatores amerikane, pandëshkueshmërisë në vendin tonë po i vjen fundi, ndërsa vetëm pak ditë më parë ish-zyrtares së lartë në administratë, Alda Klosit iu vodhën nga sanitarja dhe i biri i saj, Rozeta e Havier Dobi një shumë e majme me vlerë mbi 120 mijë euro CASH.
“[…} faktet tregojnë një histori tjetër. Tregojnë historinë se pandëshkueshmërisë po i vjen fundi. Tregojnë historinë e zyrtarëve të lartë të shqetësuar. Kam dëgjuar plot histori për njerëz që nuk i zë gjumi, duke vrarë mendjen nëse e kanë radhën ata për shpalljen tjetër non-grata apo për ndjekje penale. Dhe nëse je i shqetësuar, me shumë gjasë ke arsye të forta për t’u shqetësuar. Dhe do t’iu thoja përsëri të gjithë prokurorëve, gjyqtarëve, hetuesve, bëni punën tuaj”, tha Kim.
Duke ju përgjigjur gazetarit për insistimin e tij për reformën në drejtësi, Kim tha se duhet të kuptohet se ajo nuk do të jetë e lehtë, e shpejtë, apo e përsosur.
“Mendoj se ka rëndësi që të mbajmë në mend dhe të jemi realistë dhe të kuptojmë që diçka kaq radikale sa reforma në drejtësi nuk do të jetë e lehtë, e shpejtë, apo e përsosur. Është si të thuash që një vrapues duhet ta nisë nga maratona. Nuk fillohet aty. Po e bëre, do dështosh. Duhet të ndërtosh forcën”, vijoi diplomatja amerikane.
