Media britanike, “Daily Mail”, raporton se 50 kriminelë shqiptarë që aktualisht janë në burgjet e Mbretërisë së Bashkuar do të dërgohen në atdhe për të vuajtur dënimin e plotë si “një gjest vullneti të mirë për Vitin e Ri nga qeveria e Tiranës”.
Raportohet se këta të burgosur kanë dalë vullnetarë që të transferoheshin nga burgjet britanike në ato shqiptare si pjesë e një marrëveshjeje të re.
10 të dënuarit e parë pritet që të deportohen me një avion charter gjatë javëve të para të janarit, zbulon “Daily Mail”.
Deri më tani ndër të deportuarit kanë qenë të burgosur, që u kishin mbaruar dënimet dhe një pjesë shumë e vogël e atyre që kanë kaluar La Manshin me gomone.
Shtetasit shqiptarë përbejnë 10 për qind të të burgosurve të huaj nëpër burgjet angleze, ku shifra e tyre shkon në mbi 1336. Deri më tani do duhej vullneti dhe dëshira e të burgosurve shqiptarë që të dërgoheshin ose jo në burgjet shqiptare, por në bazë të një marrëveshjeje të viti 2021, ata mund të dërgohen edhe pa pëlqimin e tyre në vendin tonë.
Gazeta Daily Mail bën të ditur se shqiptarët që vuajnë dënimet më të gjata në burgjet britanike , përfshijnë dy vrasës dhe tre baron droge, të cilët aktualisht po vuajnë dënimin e tyre me një kosto që shkon në mbi 6.7 milionë Sterlina për shtetin britanik.
