Një protestë e organizuar nga Unioni Shqiptar i Shoqërisë Civile është zhvilluar ditën e sotme para ambasadës së Serbisë në vendin tonë.
Dhjetëra qytetarë janë mbledhur së bashku për të marshuar në drejtim të selisë diplomatike serbe në kryeqytet në shenjë mbështetje për Kosovën dhe për të denoncuar politikën agresive, luftënxitëse, destabilizuese e aneksioniste të Serbisë.
Në protestë ka përfaqësues edhe nga diaspora e Shqipërisë dhe Kosovës, që janë kthyer në atdhe për festat e fund vitit por edhe qytetarë nga vendbanimet shqiptare ne rajon, të cilët dënojnë provokimet e vazhdueshme nga serbët në Veri.
Me thirrjet ‘Kosovë-Shqipëri ne jemi 1’, me flamuj kombëtar dhe parulla, protestuesit janë mbledhur para ambasadës serbe në orën 12:00. Ata gjithashtu kanë bërë thirrje kundër “Ballkanit të Hapur” dhe kërkojnë nga Parlamenti i Shqipërisë që të votojë një rezolutë kundër krimeve dhe gjenocidit serb.
Tubimi zhvillohet në një kohë kur Serbia ka shtuar dozën e agresivitetit e ndihmuar edhe nga Rusia.
Në protestë pritet që të miratohet edhe një deklaratë, e cila do t’i dërgohet politikës vendore dhe asaj ndërkombëtare, në mbështetje të Kosovës si dhe të drejtave kombëtare.
