Protesta që ishte paralajmëruar në rrjetet sociale, kundër ndërtimit të kullës 64 kate pas TKOB-së, për të cilën ka dhënë lejen bashkia e Tiranës, është zhvilluar mbrëmjen e sotme me pjesëmarrjen e dhjetëra qytetarëve.
Së bashku me ta, aktivistë të shumtë por edhe përfaqësues të Lëvizjes “BASHKË” ngritën zërin kundër betonizimit të lulishtes së vetme që kishte mbetur e pazaptuar në qendrën historike të kryeqytetit.
Ata kritikuan modelin e zhvillimit të ndjekur nga kryebashkiaku i Tiranës, Erjon Veliaj dhe theksuan se mafia e betonit po gllabëron hapësirat e gjelbra me bekimin e qeverisë dhe bashkisë.
Qytetarët po ashtu bënë thirrje për ndalimin e ndërtimit të kullës dhe rikthimi i lulishtes për përdorim publik.
“LARG DUART NGA PARKU YNË!“, ishte parrulla kryesore e protestuesve të cilët e cilësojnë atë që po ndodh në qendër të Tiranës një krim i vërtetë kundër qytetit, i financuar me para të pista dhe i mbrojtur publikisht nga pushtetarë të korruptuar.
“Qyteti ynë po vdes pak e nga pak, me çdo hapësirë publike që zihet, me çdo park që shkatërrohet, me çdo ujdi të errët që materializohet. Pas parkut të fundit e kanë radhën të tjera hapësira të jetës urbane, siç mburren me vetëbesimin e kriminelëve të papendueshëm Edi Rama dhe Erion Veliaj”, u tha në një reagim të Lëvizjes Bashkë.
Sakaq, ambientalisti Lavdosh Feruni, i cili nuk mungoi në protest tha për mediat se sipas një sondazhi të realizuar, rezulton se 96% e qytetarëve nuk e duan ndërtimin e Kullës në Tiranë.
“Jo rastësisht unë e kam ngritur zërin edhe para 20 ditësh, kur nisi e gjithë kjo. Nga një vëzhgim në mediat sociale rezulton që 96% e qytetarëve nuk e duan këtë kullë, duan Lulishten në vend të kullës. Sot pjesëmarrja ishte solide, por do të ndryshojë në ditët ne vazhdim, me protesta, do të rritet fluksi i protestuesve për këtë kauzë”, u shpreh ai.
Në mbyllje të kësja proteste, që është e katërta në radhë që pas rrethimit të lulishtes pas TKOB, ativistët e Lëvizjes Bashkë të drejtuar nga Arlind Qorri deklaruan se tubimet në mbrojtje të hapësirave publike do të vazhdojnë.
