Kryebashkiaku i zgjedhur i Himarës, Fredi Beleri ka reaguar nga qelia e paraburgimit lidhur më protestën që po zhvillohet në pedonalen qendrore të qytetit, në mbështetje të tij.
Teksa qindra qytetarë në tubim kërkojnë lirimin e tij nga burgu dhe ushtrimin e së drejtës për tu betuar në detyrë, pasi është fituesi legjitim i zgjedhjeve të 14 Majit, Beleri shprehet se ai po qëndron “i fortë”.
Në një postim në llogarinë e tij në rrjetin social Facebook shkruhet: “Jam mirë, jam i fortë. Jam duke pritur”.
Më tej ai nënvizon se nuk do të dorëzohet përballë vendimeve të drejtësisë shqiptare ddhe se në përfundim do t’ia dalë të betohet në postin, për të cilin e kanë votëbesuar qytetarët.
“Kanë kaluar 3 muaj, jam i vendosur të ulem këtu sa të duhet, të betohem kryetar bashkie dhe të shkoj atje ku më kanë emëruar himariotët. Dua t’u them atyre të jenë të fortë, të presin dhe të kenë besim te Zoti dhe besim në luftë. Drejtësia mund të jetë e ngadaltë. Ndonjëherë më shpejt, ndonjëherë më ngadalë, por në fund fiton gjithmonë.”
Kujtojmë se Beleri qëndron pas hekurave prej mbrëmjes së 12 Majit, ku ai u arrestua nën akuzën për shitblerje votash. Ai ka kërkuar zbutjen e masës së sigurisë, por të gjitha shkallët e drejtësisë e kanë hedhur poshtë kërkesën e përfaqësuesve të tij ligjorë.
LEXO EDHE:
VIDEO/ Himara proteston në mbështetje të Belerit, qytetarët kërkojnë lirimin e kryebashkiakut
