Kulla me 64 kate që do të ndërtohet në lulishten pas TKOB, për të cilën sic vetë kryeministri Edi Rama ka pranuar se Bashkia Tiranë, e drejtuar nga Erion Veliaj ka marrë 4 milionë euro taksë për të dhënë lejen për betonizim, ka nxitur reagim të fortë qytetar.
Prej ditës kur hapësira e gjelbërt u rrethua për të nisur punimet, dhjetëra qytetarë së bashku me anëtarë të Lëvizjes “BASHKË” kanë protestuar kundër projektit që betonizon qendrën e kryeqytetit.
Tubimet kundër “Mount of Tirana” do të vijojnë sërish këtë të hënë, me Lëvizjen “BASHKË” që u bën thirrje qytetarëve të ngrihen për të ndalur masakrën urbane të kryebashkiakut Veliaj dhe kryeministrit Rama.
“Larg duart nga parku ynë” është moto e protestës, e cila do të zhvillohet në orën 18:00.
“Çka po ndodh në qendër të Tiranës është një krim i vërtetë kundër qytetit. Një krim i financuar me para të pista dhe i mbrojtur publikisht nga pushtetarë të korruptuar. Qyteti ynë po vdes pak e nga pak, me çdo hapësirë publike që zihet, me çdo park që shkatërrohet, me çdo ujdi të errët që materializohet.
Pas parkut të fundit e kanë radhën të tjera hapësira të jetës urbane, siç mburren me vetëbesimin e kriminelëve të papendueshëm Edi Rama dhe Erion Veliaj. Në këto kushte, detyra jonë si qytetarë është të ngremë zërin. Ditën e hënë në orën 18:30 Lëvizja BASHKË u bën sërish thirrje qytetarëve të Tiranës për të dalë në protestë. Bashkë për një qytet të jetueshëm!”, është mesazhi i partisë së drejtuar nga aktivisti Arlind Qorri.
