Debati i ashpër me kryeministrin Edi Rama, të cilin e akuzoi se po tenton të marrë peng Gjykatën Kushtetuse duke propozuar një votim të fshehtë vetëm që të “blejë” vota nga PD për Ardian Dvoranin, kur nuk e siguron dot shumicën e cilësuar (84 vota), i kushtoi shtrenjtë deputetit Gazment Bardhi.
Ai u përjashtua nga seanca plenare prej kryesueses Ermonela Felaj, e cila përdori si argument gjuhën fyese, pasi Bardhi i kujtoi kryeministrit se po sillet si mafioz dhe rrugac me votimin për Kushtetuesen, madje ka angazhuar oligarkë që të blejnë deputetë nga PD për Dvoranin.
Por në krahun tjetër aspak e denjë për një kryeministër dhe për Kuvendin e Shqipërisë nuk ishte gjuha e Ramës, i cili e thirri më shumë se 15 herë Bardhin “palaço’, në momentin kur ai i kujtoi oligarkët.
Në atë moment Rama doli nga binarët duke i thënë Bardhit: “Je palaço cirku” apo “Ik ore zagar“.
Për gjuhën e përdorur nga Rama dhe sjelljen jo etike, grupi i deputeteve të PD pranë Enkelejd Alibeajt kanë kërkuar vendosjen e një mase disiplinore ndaj kryeministrit.
