Sot kanë nisur punimet për ndërtimin e Teatrit të ri Kombëtar. Zona u rrethua me forca të shtuara policore dhe një kordon sigurie. Nën këtë “pamje” një moment i çuditshëm ndodhi, përpara shiritit ku ishte vendosur gropa e nisjes së punimeve për godinën e re.
Në një çast, drejtori aktual i Teatrit Kombëtar, Altin Basha, u drejtua për në zonën ku do të zhvillohej ceremonia, por e ndaloi policia.
Efektivët e vendosur në perimetrin e sigurisë për të shmangur incidentet me protestuesit i ndaluan hyrjen Bashës pasi nuk e kanë njohur. Ai shihet teksa iu shpjegon arsyen e pranisë së tij në këtë përurim, por efektivët shohin njëri-tjetrin.
Të pranishëm ishin qytetarë që kundërshtojnë projektin. Qytetarët u revoltuan me mbërritjen e kryebashkiakut Erion Veliaj, i cili është shfaqur krah aktorit të humorit dhe investitorit strategjik, Gazmend Paja. Ata e kanë konsideruar hajdut që i përket burgut kryebashkiakun.
Disa prej këtyre artistëve të cilët e përkrahin projektin nuk munguan edhe në këtë aktivitet.
Robert Ndrenika, Luiza Xhuvani, Artan Imami, Tinka Kurti, Luftar Paja, ishin prezent. Po ashtu, të pranishëm ishin dhe artistë të tjerë si Kastriot Çaushi, Dritan Boriçi, Gaz Paja, Lulzim Zeqja, Arben Derhemi, Indrit Çobani.
Kujtojmë që regjisori Altin Basha u emërua para disa ditësh drejtor i Teatrit Kombëtar duke zëvendësur Hervin Çulin.
