Tirana u trondit sërish dy ditë më parë nga vrasja e Edmond Papës, i cili u ekzekutua brenda një lokali te “Komuna e Parisit”.
49-vjeçari u dërgua me urgjencë te “Trauma”, por nuk mundi t’i mbijetonte plagëve të marra. Burimet mediatike bëjnë me dije se viktima dyshohet të jetë ndjekur nga autori prej disa ditësh, jo vetëm në Tiranë por edhe në Sarandë ku jetonte.
Dyshimet e policisë janë se atentatori mund të jetë vënë në dijeni për udhëtimin e Papës në Tiranë nga ndonjë i afërm i viktimës.
Grupi hetimor ka sekuestruar kamerat e sigurisë në zonën ku ndodhi vrasja, jo vetëm të datës 16, por edhe të ditëve më parë për faktin se dyshohet që autori ose autorët mund të kenë vëzhguar më herët zonën pranë banesës së vëllait të Edmond Papës. Deri në këtë fazë të hetimit policia përjashton mundësinë e vrasësve me pagesë.
Grupi hetimor ka sekuestruar edhe kamerat e sigurisë së zonës ku ndodhi vrasja edhe të ditëve të mëparshme, për shkak se dyshohet se autori ose autorët mund të kenë vëzhguar më herët zonën pranë banesës së vëllait të Edmond Papës.
Në funksion të hetimeve, janë marrë në pyetje 10 persona, dëshmitarë të ngjarjes dhe familjarë të viktimës. Dëshmitarët kanë treguar që kanë parë një person të maskuar që është afruar dhe ka qëlluar ndaj Papës, ndërsa familjarët kanë rrëfyer mbi të shkuarën e viktimës.
- Kush është Edmond Papa? Ngjarja dhe pista e hetimit
Sipas të afërmve, Papa ka kryer 7 vite burg në Greqi për trafik të lëndëve narkotike dhe ishte i skeduar në Angli po për të njëjtën vepër penale.
Ngjarja ka ndodhur më 16 dhjetor në hyrjen e një lokali në rrugën “Fadil Bodinaku”, pranë banesës së vëllait të tij. Sipas burimeve 49-vjeçari me origjinë nga Fieri kishte pak kohë që ishte kthyer në Shqipëri. Ndërsa një tjetër pistë është ajo e aktivitetit kriminal në Angli, për trafik droge.
Nisur nga këto të dhëna, policia ka ngritur menjëherë pistën e vrasjes për ndonjë konflikt të mundshëm si pasojë e prishjes së pazareve të drogës. Por hetuesit nuk janë mjaftuar pasi kanë nisur verifikimet nëse viktima kishte edhe ndonjë tjetër konflikt për pronat. Kjo pasi Edmond Papa ishte posedues i disa pronave në Ksamil, dhe pronar i një hoteli të njohur në Sarandë.
