Partia Demokratike mbetet e vendosur për të respektuar kordonët e sigurisë për liderët e europianë, por jo ata kordonë që mbrojnë pushtetin.
Klevis Balliu, shef i organizimit të PD, thotë për Ora News se opozita do të respektojë protokollin e sigurisë për Samitin, ndërsa shton se protesta do të jetë paqësore.
Paralajmërimeve të policisë se nuk do të lejojnë grumbullimin e qytetarëve në Bulevard, Balliu përgjigjet se askush nuk mund ta ndalojë protestën.
“Që të ketë kordonë të policisë dhe bllokim rrugësh është normale se është Samiti. Deri në atë pikë që është në normalitetin e sigurisë brenda protokolleve të sigurisë do të respektohen, ekzagjerimet pastaj që të tentojnë të bllokojnë rrugën e PD, qytetarët që të vijnë të protestojnë nuk janë siguri për BE apo liderët e tyre por janë ekzagjerime për të sulmuar protestën në mënyrë që të mbash pushtetin e radhës, nuk kanë lidhje me samitin. Ato kordonë, nëse do të jenë, që kërkojnë të mbrojnë pushtetin e Ramës dhe të ndalojnë protestën, protestën nuk do ta ndalojnë dot”.
Ai thotë se skenari i vetëm për nesër është një dhe i vetëm: “Qytetarët do të dalin të protestojnë në Bulevardin “Dëshmorët e Kombit””.
Balliu garanton se protesta do të jetë paqësore dhe se do bëjnë gjithçka për të kryer misionin e saj.
“Kjo protestë bëhet për të treguar dhe mbrojtur të vërtetën. Me 6 dhjetor të mblidhemi se do vijnë aleatët e Shqipërisë dhe shtetit shqiptar, kemi detyrimin ti tregiojmë partnerëve tanë të vërtetën. Edi Rama thotë se media është e lirë, ju duket e lirë Ora News, që ka mbi kokë gjithë shtetin? Ju duket e lirë media kur del Erion Veliaj dhe kërcënon gazetarët? Këto duhet ti dijë BE. Vetëm me të vërtetën dhe votën shpëton Shqipëria”.
