Drejtori i Departamentit të Rendit dhe Sigurisë Publik Rebani Jaupaj u pyet nga gazetarët në lidhje me protestën, që opozita ka lajmëruar më datën 6 dhjetor.
Ai tha se zona, në të cilën ka kërkuar opozita të protestojë është pjesë e perimetrit të sigurisë duke lënë të kuptohet se tubimi i tyre nuk do të lejohet para godinës së kryeministrisë.
“Perimetri do të fillojë nga ora 14:00 e datës 5, me kufizime të perimetrit. Ky perimetër do mbahet deri në përfundimin e samiti dhe largimin e të gjithë personaliteteve nga vendi ynë. Në do të përqendrohemi për të bërë ne dije se qytetarët duhet të marrin njoftimin për bllokimin e rrugëve, që policia ka planifikuar në këtë plan masash”, tha Jaupaj.
Ai u shpreh se tubimin jashtë zonës së sigurisë nuk e pengon, ndërsa u zotua se Policia e Shtetit do të marrë çdo masë për të garantuar dhe protestën e opozitës, por vetëm pasi të kenë rënë dakord për vendin se ku do ta zhvillojnë.
“Policia ka kthyer një përgjigje, dhe përgjigjja jonë është bërë publike dhe i kemi adresuar të gjitha kufizimet që Policia ka sa i takon këtij aktiviteti. Pjesa tjetër, sheshi Skënderbej, që ata të mbajnë tubimin, është e drejta e tyre dhe natyrisht dhe ne do marrim masa për mbarëvajtjen e atij tubimi, por pasi të kemi rënë dakord për vendin se ku do të zhvillohet”, tha Jaupaj.
- Gjatë dhe pas zhvillimit të Samitit, është parashikuar ky perimetër sigurie:
Bulevardi “Dëshmorët e Kombit”, nga ura e Dajtit deri te Sheshi “Nënë Tereza”;
Bulevardi “Bajram Curri” nga kryqëzimi me rrugën e “Elbasanit” deri te kryqëzimi me rrugën “Ibrahim Rugova”;
Rruga “Papa Gjon Pali II” nga ETC-RTSH-Stadium;
Rruga “Dervish Hima”;
Rruga “Asim Zeneli”;
Rruga “Themistokli Gërmenji”, pranë rrugës së Elbasanit dhe te kryqëzimi afër rrugës “Papa Gjon Pali II”;
Rruga “Ismail Qemali”, nga kryqëzimi i Liceut deri te rruga e “Elbasanit”.
Rruga “Mustafa Matohiti”, pranë shkollës “Kosova”;
Rruga “Jul Variboba”, pranë postës, në rrugën e Elbasanit dhe rrugën “Papa Gjon Pali II”;
Rruga “Fatmir Haxhiu”, te ETC;
Rruga “Lekë Dukagjini”, nga sheshi “Shopen”, deri te stadiumi “Air Albania” dhe përreth stadiumit;
Rruga “Skerdilajd Llagami” dhe rruga “Faik Konica”.
- Ndalim të qarkullimit të automjeteve do të ketë edhe në aksin rrugor:
Rinas – Mbikalimi i Kasharit – Autostrada “Durrës – Tiranë” – Ish-sheshi “Shqiponja” – Unaza e Tiranës – Rrethrrotullimi i Saukut – Rrethrrotullimi pranë Akademisë së Policisë – Pallati i Brigadave – Rrethrrotullimi i qytetit “Studenti” deri tek kryqëzimi me bulevardin “Bajram Curri”.
Kufizime të qarkullimit të automjeteve të tonazhit të rëndë, do të ketë në aksin rrugor “Shkodër – Lezhë – Milot – Thumanë – Fushë Krujë – Vorë”.
